Hər il noyabrın 9-u xalqımız üçün sadəcə sıradan bir gün deyil, milli kimliyimizin, azadlığımızın və suverenliyimizin təntənəli şəkildə qeyd olunduğu müqəddəs bir gündür – Dövlət Bayraq Günüdür. Mavi, qırmızı və yaşıl rənglərin vəhdətindən yaranan, üzərində səmadan süzülən aypara və səkkizguşəli ulduzu daşıyan bu müqəddəs bayraq bizim keçmişimiz, bu günümüz və parlaq gələcəyimizdir.

Bizim şanlı üçrəngli bayrağımız xalqımızın əsrlər boyu yaşatdığı azadlıq idealının şah əsəridir.Mavi rəng – Türk xalqına mənsubiyyətimizi, ucalığı, sülhü və açıq səmanı, qırmızı rəng – müasirləşməyi, demokratiyanı, inkişafı və azadlıq uğrunda tökülən qanların xatirəsini,yaşıl rəng – islam sivilizasiyasını, əmin-amanlığı, təbiəti və torpağa olan sonsuz sevgini simvolizə edir. Mərkəzdə yerləşən aypara və səkkizguşəli ulduz isə türkçülüyün, kamilliyin və Azərbaycan xalqının əbədi varlığının əvəzsiz nişanəsidir.

Bu gün bayrağımız bizim üçün ikiqat qürur mənbəyidir. Müzəffər Ali Baş Komandan cənab İlham Əliyevin rəhbərliyi və rəşadətli Ordumuzun qanları, canları bahasına azad edilən əzəli torpaqlarımızda – Şuşada, Xankəndidə, Laçında, Kəlbəcərdə və digər doğma yurdlarımızda üçrəngli bayrağımız əzəmətlə dalğalanır. Hər bir bayraq dirəyi ucaldığı o torpaqlarda xalqımızın əbədi haqqının və dəyişməz suverenliyinin imzasıdır.
Ümummilli Lider Heydər Əliyevin dediyi kimi: "Hər bir azərbaycanlı öz bayrağı ilə fəxr etməlidir."

Bayraq – dövlətin varlığı, xalqın birliyi, vətəndaşın namusudur. Bu gün hər birimiz bu müqəddəs simvolun uca tutulması, gələcək nəsillərə şərəflə ötürülməsi üçün əlimizdən gələni etməliyik. Azərbaycan bayrağının dalğalandığı hər yer bizim evimiz, bizim qürur yerimizdir.

Dövlət Bayraq Günümüz mübarək olsun! Qoy üçrəngli bayrağımız hər zaman azad və suveren Azərbaycanımızın səmasında əbədi dalğalansın!

İlham Məmmədov,

Milli Məclisin deputatı, YAP İdarə Heyətinin üzvü