15 oktyabr — müasir Azərbaycan tarixinin ən əlamətdar günlərindən biridir. Bu gün Müzəffər Ali Baş Komandan, Azərbaycan Respublikasının Prezidenti cənab İlham Əliyevin birinci və ikinci dəfə dövlət başçısı seçildiyi gündür.
Azərbaycan xalqının taleyində elə günlər var ki, həmin günlərdə ölkənin gələcək istiqaməti, müstəqilliyin möhkəm dayaqları və inkişafın strateji əsasları müəyyən olunur. 2003-cü ilin 15 oktyabrı məhz belə günlərdən biridir. Həmin gün Ulu Öndər Heydər Əliyevin siyasi kursunun layiqli davamçısı İlham Əliyev xalqın etimadını qazanaraq Prezident seçildi və Azərbaycan üçün yeni bir inkişaf dövrünün təməlini qoydu.
Xalq 2003-cü ildə İlham Əliyevi Prezident seçməklə əslində sabitliyin, təhlükəsizliyin, tərəqqinin və ədalətin davamına səs verdi. Bu etimadın nəticəsində Azərbaycan son illərdə regionun liderinə çevrildi, dünyada etibarlı tərəfdaş kimi tanındı. Prezident İlham Əliyevin apardığı məqsədyönlü siyasət, dövlətçilik prinsiplərinə sadiqliyi və uzaqgörənliyi ölkəmizi regionun ən güclü dövlətinə çevirdi.
2008-ci ilin 15 oktyabrında xalq bir daha İlham Əliyevə səs verərək onun siyasətinə inamını təsdiqlədi. Həmin gündən bu günə qədər Prezident İlham Əliyev xalqdan aldığı dəstəyi əzmlə doğruldub — Azərbaycanın suverenliyini bərpa edib, dövlətçiliyimizi möhkəmləndirib, ordumuzu dünyanın ən güclü orduları sırasında qərarlaşdırıb.
İlham Əliyevin rəhbərliyi ilə Azərbaycan beynəlxalq müstəvidə nüfuz sahibi oldu, BMT Təhlükəsizlik Şurasının qeyri-daimi üzvü seçildi, regionda sabitlik və əməkdaşlığın əsas dayağına çevrildi. Enerji layihələrindən tutmuş, müdafiə sənayesinə, sosial islahatlardan mədəni diplomatiyaya qədər hər bir sahədə əldə edilən nailiyyətlər onun uzaqgörən liderliyinin bəhrəsidir.
Ən böyük tarixi nailiyyət isə 2020-ci ildə qazanılan Böyük Zəfər oldu. Bu qələbə yalnız hərbi deyil, həm də siyasi, diplomatik və mənəvi mübarizənin nəticəsi idi. Bu gün azad Qarabağda dalğalanan üçrəngli bayrağımız məhz Prezident İlham Əliyevin dəmir iradəsinin, xalqın birliyinin və ordumuzun qəhrəmanlığının simvoludur.
Prezident İlham Əliyev təkcə güclü dövlətin rəhbəri deyil, həm də xalqa bağlı, vətəndaşın rifahını hər şeydən üstün tutan liderdir. Onun həyata keçirdiyi sosial islahatlar milyonlarla insanın həyat səviyyəsini yüksəldib, hər bir Azərbaycan vətəndaşına dövlətin qayğısını hiss etdirib.
Bu gün, 15 oktyabrda, Azərbaycan xalqı bir daha böyük qürurla bildirir:
Bizim uğurlarımızın memarı İlham Əliyevdir!
O, müasir Azərbaycanın simasını formalaşdıran, dövlətimizi qalib xalqın qalib liderinə çevirən şəxsiyyətdir.
Bu əlamətdar gün münasibətilə Müzəffər Ali Baş Komandan, cənab Prezident İlham Əliyevi səmimi qəlbdən təbrik edir, ona möhkəm can sağlığı, uzun ömür, ölkəmizin rifahı naminə gördüyü ali missiyada yeni nailiyyətlər arzulayıram!
Azərbaycanın sabahı İlham Əliyevin uzaqgörən siyasəti ilə daha parlaq, daha qüdrətli olacaq!
Əli İbrahimov, hüquqşünas
