Cari ilin avqustun 11-də Azərbaycan Respublikasının Prezidenti Cənab İlham Əliyevin Naxçıvan Muxtar Respublikasında Azərbaycan Televiziyasına müsahibə verməsi bölgənin gələcək inkişaf istiqamətləri ilə bağlı mühüm mesajların səsləndirilməsi baxımından əlamətdar hadisə kimi qiymətləndirilə bilər. Dövlət başçısının səfəri zamanı Naxçıvanda həyata keçirilən sosial, iqtisadi və şəhərsalma layihələri ilə bağlı mühüm addımlar atılıb. Prezidentin Naxçıvan şəhərinin 2044-cü ilədək inkişafını nəzərdə tutan Baş Planla tanış olması, sosial evlər kompleksinin təməlinin qoyulması, şəhərin infrastrukturunun yenilənməsi və tarixi-mədəni irsin qorunması istiqamətində görülən işlər muxtar respublikanın gələcək inkişafına xüsusi diqqət ayrıldığını göstərir. Bütün bunlar Naxçıvanın müasir, dayanıqlı və hərtərəfli inkişafına hesablanmış dövlət siyasətinin ardıcıl şəkildə davam etdirildiyini nümayiş etdirir.
Səfər çərçivəsində dövlət başçısı, həmçinin Azərbaycan Televiziyasına (AzTV) müsahibə verərək jurnalistin suallarını cavablandırmış, Naxçıvanın gələcək inkişafı və qarşıda duran əsas vəzifələrlə bağlı fikirlərini bölüşmüşdür. Naxçıvanın zəngin təbii imkanları və enerji potensialı regionun gələcək inkişafı üçün geniş perspektivlər açır. Xüsusilə günəş enerjisindən səmərəli istifadə edilməsi bərpaolunan enerji mənbələrinin inkişafına mühüm töhfə verə bilər. Muxtar respublikada qazlaşma səviyyəsinin 100 faizə çatması və Azərbaycanın enerji təminatı baxımından regionda qabaqcıl mövqedə olması ölkəmizin bu sahədə əldə etdiyi nailiyyətləri nümayiş etdirir. Eyni zamanda, Naxçıvanın zəngin tarixi, mədəniyyəti və memarlıq irsi onun turizm potensialını daha da artırır. Bununla yanaşı, Zəngəzur dəhlizinin yaradılması təşəbbüsünün Azərbaycanın irəli sürdüyü mühüm regional layihələrdən biri olması Naxçıvanın ölkəmizin nəqliyyat-kommunikasiya sistemində strateji əhəmiyyətini daha da artırır. Bu layihənin reallaşması Naxçıvanın Azərbaycanın əsas hissəsi ilə nəqliyyat əlaqələrinin genişlənməsinə və regionda yeni iqtisadi imkanların yaranmasına mühüm şərait yaradacaqdır.
Nəticə etibarı ilə, Naxçıvanın qarşıdakı illərdə inkişafı Azərbaycanın iqtisadi və strateji imkanlarının genişlənməsində mühüm rol oynayacaq. Səfər çərçivəsində təqdim olunan layihələr və müəyyənləşdirilən hədəflər bölgənin sosial-iqtisadi inkişafının yeni mərhələyə qədəm qoyduğunu göstərir. Atılan məqsədyönlü addımlar Naxçıvanda müasir infrastrukturun formalaşmasına, əhalinin rifahının yüksəlməsinə və investisiya imkanlarının genişlənməsinə şərait yaradacaq. Beləliklə, Naxçıvanın daha güclü və müasir diyara çevrilməsi ölkəmizin ümumi inkişafına da mühüm töhfə verəcək.
Zülfiyyə Mahmudova
YAP Yevlax rayon təşkilatının əməkdaşı
