Newscenter.az.22.02.2019. Fevralın 22-də ümumi təhsil müəssisələri və uşaq-gənclər inkişaf mərkəzlərinin şagirdləri arasında keçirilən gənc kimyaçıların yaradıcılıq müsabiqəsinin rayon mərhələsi keçirilib. Newscenter.az xəbər verir ki, müsabiqə məktəblilərin kimya fənninə olan marağının daha da artırılması, onların bu sahədə nəzəri və təcrübi biliklərinin təkmilləşdirilməsi, istedadlı şagirdlərin aşkara çıxarılması məqsədilə keçirilir.

Bakı Şəhəri üzrə Təhsil İdarəsinin müdiri (BŞTİ) Rəşad Tağıyev paytaxtdakı Məktəb Lisey Kompleksində müsabiqənin gedişini izləyib.

Qeyd edək ki, müsabiqənin rayon mərhələsində 293 ümumi təhsil müəssisəsindən 879 şagird iştirak edib. Şagirdlər 2 akademik saat ərzində ümumi təhsil və uşaq-gənclər inkişaf mərkəzlərinin proqramlarına uyğun olaraq 30 sualdan ibarət test tapşırığını və 2 məsələni yerinə yetiriblər.

Test tapşırıqlarının hər birinin doğru cavablandırılması 1 balla, məsələ isə 5 balla qiymətləndiriləcək.
Fevralın 28-də keçiriləcək müsabiqənin final mərhələsinə hər rayondan 1 komanda olmaqla, ümumilikdə 12 komanda qatılacaq. Müsabiqənin III mərhələsində 30 test sualı və 2 məsələ ilə yanaşı, komandalar 1 təcrübə işi də yerinə yetirəcəklər. Müsabiqənin nəticələrinə görə, 3 yeri tutmuş komandalar qalib hesab olunacaq.