Newscenter.az.16.09.2019. ABŞ İnkişaf Agentliyinin Şəffaflıq Naminə Vətəndaş Cəmiyyəti Layihəsi (ECSOFT) çərçivəsində Qəbələ şəhərində “Çirkli pulların yuyulmasına və terrorçuluğun maliyyələşdirilməsinə qarşı mübarizədə QHT-lərin öhdəlikləri” adlı təlim keçirilib.

Newscenter.az xəbər verir ki, tədbirdə Ədliyyə Nazirliyinin QHT-lərlə iş şöbəsinin rəisi Səbinə Salmanova və ECSOFT layihəsinin nümayəndələri Məhəmməd Quluzadə və Əliməmməd Nuriyev Qəbələ şəhəri və ətraf 5 rayondan olan 20 QHT nümayəndəsinə qeyd edilən mövzuda təqdimatlar ediblər.

Tədbirin məqsədi region QHT-lərini “Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında” Azərbaycan Respublikası Qanunundan irəli gələn öhdəliklərlə tanış etmək və QHT-ləri maraqlandıran suallarını cavablandırmaq olub.

Ədliyyə Nazirliyinin nümayəndəsi Səbinə Salmanova ECSOFT layihəsi çərçivəsində nazirlik tərəfindən mövzuya aid QHT-lər üçün metodik vəsaitin hazırlandığını qeyd edib və yaxın günlərdə bu vəsaitin dərc olunmuş və fərdi elektron pəncərə vasitəsi ilə elektron versiyalarının QHT-lərə paylanılacağını vurğulayıb.

Oxşar tədbirlər Quba, Şirvan və Gəncə şəhərlərində də keçirilib. Yaxın zamanda Bakı şəhərində də tədbirin təşkil edilməsi planlaşdırılır.