Newscenter.az.9.02.2021. Gəncə-Qazax iqtisadi rayonunda fermerlərin aqrar məsləhət xidmətləri ilə təminatının yaxşılaşdırılması üçün pilot layihə başlayır. FAO-nun (BMT-nin Ərzaq və Kənd Təsərrüfatı Təşkilatı) ölkəmizdə həyata keçirdiyi “Aqrar məsləhət xidmətlərinin gücləndirilməsi” layihəsi çərçivəsində Gəncədə regional ofis açılıb. Avropa Ittifaqının maliyyələşdirdiyi bu layihə Azərbaycanda aqrar məsləhət xidmətlərinin gücləndirilməsi məqsədilə ölkə üzrə 5 illik strategiya hazırlanması ilə yanaşı, 2 pilot regionda – Gəncə və Quba regionlarında bu strategiyaya uyğun pilot fəaliyyətlər icra edilməsini nəzərdə tutur.
Newscenter.az xəbər verir ki, Gəncə regional ofisin təqdimatında layihənin milli koordinatoru Vüqar Bəşirov layihənin məqsəd və vəzifələri haqda məlumat verməklə yanaşı 9 rayonu əhatə edən bu regionda aqrar məsləhət xidmətlərinin inkişafı üçün bir sıra imkanlar, güclü və zəif cəhətlər, eləcə də təhlükə yaradacaq amillər barədə məlumat verib. Kənd təsərrüfatı sahəsində təhsil müəssisələri və tədqiqat institutları, münbit torpaqlar və tərəvəzçilik sahəsinin inkişafı regionun üstünlükləri kimi qeyd edib. Lakin ekspert kiçik fermerlərin bazara çıxışının məhdudluğu, rayonlar və sektorlar üzrə ixtisaslaşmış sertifikatlı aqrar məsləhətçilərin sayının azlığı, kənd təsərrüfatında həm bitkilərin, həm də heyvanların aşağı məhsuldarlığı bu sahənin inkişafına təsir göstərəcək amillər kimi vurğulayıb.
Bildirilib ki, layihənin icrası ilə əlaqədar yaxın günlərdə aqrar məsləhət xidməti sektorunun iştirakçıları ilə aqrar məsləhət xidmətlərinin gücləndirilməsi sahəsində müzakirələrə başlanılacaq. Müzakirələr fermerlərin aqrar məsləhət xidməti ehtiyacları ilə xidmət təminatçılarının təkliflərini ortaq məxrəcə gətirmək istiqamətində aparılacaq. Yerli innovasiyalar üçün prioritet və imkanların müəyyənləşdirilməsi üçün region mütəxəssislərini və fermerlərini əhatə edən dəyirmi masaların və seminarların təşkili də nəzərdə tutulub. Regionda 2 icma (kənd və bələdiyyə) seçilərək, pilot fəaliyyətlər o icmalarda tətbiq ediləcək.
Təqdimatda dövlət aqrar inkişaf mərkəzlərinin və özəl aqrar məsləhət xidməti təminatçılarının aqrar məsləhət xidmətlərinin inkişafındakı rolu barədə də müzakirələr aparılıb.
Təqdimatda qeyd olunub ki, “Aqrar məsləhət xidmətlərinin gücləndirilməsi” layihəsinin ölkə üzrə tətbiqi seçilmiş regionlardakı pilot layihələrin uğurundan asılı olacaq.
