“Cessna 206” təyyarəsinin qəzaya uğramasından sonra Kolumbiya cəngəlliklərində 40 gün qalmış uşaqlar un və meyvə sayəsində sağ qalıblar.

Newscenter.az xəbər verir ki, bu barədə iyunun 12-də “İTV News” məlumat yayıb.

“Təyyarə qəzaya uğrayanda onlar (uşaqlar - red.) bir az un götürüb, onun köməyi ilə sağ qalıblar. Un bitdikdən sonra meyvə yeməyə başladılar", - nəşr uşaqların qohumu Fidensio Valensiyanın sözlərini sitat gətirir.

Qeyd edək ki, təyyarə qəzası mayın 1-də baş verib. Mühərriki sıradan çıxan “Cessna 206” təyyarəsində hadisə zamanı dörd uşaq olub. Təyyarədə olan 3 böyük, o cümlədən pilot həlak olub. Mayın 16-da onların meyitləri cəngəllikdə tapılıb.

Mayın 29-da kolumbiyalı xilasedicilər cəngəllikdə itkin düşən uşaqların izlərini tapıblar. Axtarış zamanı onlar ayaq izinə və dişləmə izləri olan meyvə parçalarına rast gəliblər.

Anar TAGİYEV