Vaşinqton Qəzza zolağı infrastrukturunun bərpası planı üçün büdcədən 60 milyard dollar qrant və kredit zəmanəti verməyi planlaşdırmır. Bu barədə ABŞ Dövlət Departamentinin X sosial media platformasında verdiyi açıqlamada bildirilib.

"Bu, saxta xəbərdir. Planda ABŞ-ın 60 milyard dollar ödəyəcəyi heç bir yerdə deyilmir", - deyə bəyanatda bildirilir. Eyni zamanda, Dövlət Departamenti Fələstin anklavının bərpası planının mövcudluğunu inkar etmir.

Daha əvvəl "The Wall Street Journal" qəzeti mənbələrə istinadən ABŞ prezidentinin elçisi Stiven Vitkoff və Amerika liderinin kürəkəni, sahibkar Cared Kuşnerin Qəzza zolağının yenidən qurulması üçün təklif hazırladıqlarını bildirmişdi. "Project Sunrise" "bombalanmış anklavı parlaq bir metropolisə" çevirmək üçün nəzərdə tutulub. ABŞ tərəfi bunun 10 il və 112,1 milyard dollar tələb edəcəyini təxmin edir. Qəzet yazır ki, planda Qəzzanın yenidən qurulmasını hansı ölkələrin və şirkətlərin maliyyələşdirəcəyi, eləcə də 2 milyon fələstinlinin yenidənqurma zamanı harada yaşayacağı göstərilməyib.

Lakin, planda Vaşinqtonun bu layihədə əsas oyunçu olmağa, o cümlədən ümumilikdə təxminən 60 milyard dollar dəyərində qrant və kredit zəmanətləri verməyə hazır olduğu göstərilib. Adı çəkilməyən ABŞ rəsmisi qəzetə bildirib ki, təklif artıq "varlı Körfəz krallıqları, Türkiyə və Misir də daxil olmaqla potensial donorlara" təqdim edilib.