Newscenter.az.20.10.2020. Biznes planların düzgün hazırlanması, maliyyənin idarə edilməsi və hesabatlığın təmin olunması, kiçik və orta biznesin (KOB) maliyyə savadlığının artırılması mikro, kiçik və orta sahibkarlıq subyektlərinin maliyyə resurslarına çıxışının yaxşılaşdırılması baxımından əhəmiyyətlidir.

Newscenter.az xəbər verir ki, bu barədə İqtisadiyyat Nazirliyi yanında Kiçik və Orta Biznesin İnkişafı Agentliyinin (KOBİA) açıqlamasında bildirilir.

Məlumatda həmçinin deyilir ki, qurumun təşkilatçılığı, müxtəlif bankların kredit və satış departamentlərinin rəhbərlərinin iştirakı ilə keçirilmiş vebinarda məhz bu mövzuya həsr olunub. Onlayn tədbirdə KOB subyektlərinin maliyyə resurslarına çıxışı, KOB-lar üçün mövcud maliyyə alətləri, kredit müraciətlərinə dair müasir tələblər, müvafiq istiqamətdə banklar və KOB-lar arasında əməkdaşlıq məsələləri müzakirə edilib.

Vebinarda KOB-ların maliyyə resurslarına çıxışının yaxşılaşdırılmasının KOBİA-nın fəaliyyət istiqamətlərindən olduğu, Agentliyin KOB inkişaf mərkəzləri tərəfindən bu sahədə sahibkarlara müxtəlif dəstək və xidmətlərin göstərildiyi bildirilib. Bakı KOB İnkişaf Mərkəzinin idarəedici təşkilatı olan Azərbaycan Bank Tədris Mərkəzinin direktoru Cavanşir Abdullayev qeyd edib ki, KOB inkişaf mərkəzləri tərəfindən sahibkarlara biznes planların tərtib olunmasında dəstək göstərilir, maliyyə savadlığının artırılması üçün təlim və seminarlar keçirilir, məsləhət xidmətləri və digər xidmətlər təqdim edilir. Maliyyə resurslarına çıxışla bağlı KOB inkişaf mərkəzlərində göstərilən dəstək və xidmətlərin kredit müraciətləri zamanı KOB-larla yanaşı, bankların işini də asanlaşdıracağı vurğulanıb, banklar KOB inkişaf mərkəzləri ilə fəal əməkdaşlığa dəvət olunub.

Qeyd edək ki, KOB inkişaf mərkəzləri hazırda Bakı, Sumqayıt və Xaçmaz şəhərlərində fəaliyyət göstərir və bu mərkəzlərdə KOB subyektlərinə və öz biznesini qurmaq istəyən şəxslərə ödənişsiz təlim-tədris xidmətləri təqdim olunur.