Ermənistanın paytaxtı İrəvan şəhərində keçirilən Ağır Atletika üzrə Avropa çempionatının açılış mərasimi zamanı Azərbaycan bayrağını yandıran erməni vandalı Aram Nikolyan polisə aparılıb.

Newscenter.az-ın məlumatına görə, “Report” Ermənistan KİV-inə istinadən xəbər verir ki, bu barədə vəkil Aleksandr Koçubayev sosial şəbəkədə məlumat verib.

“Nikolyan Malatya polis şöbəsinə gətirilib. İlkin məlumatlara görə, xuliqanlıq maddəsi ilə cinayət işi başlanıb”, - Koçubayev yazıb.

Xatırladaq ki, Nikolyan təntənəli mərasim zamanı bayraqdarın əlindən Azərbaycan bayrağını qoparıb yandırıb, daha sonra onunla birlikdə səhnədən qaçıb.