Qırğız Respublikasının Prezidenti Sadır Japarov və Tacikistan Respublikasının Prezidenti Emoməli Rəhmon danışıqlar aparıb.

Newscenter.az Qırğızıstan prezidentinin rəsmi saytına istinadən bildirir ki, Sadır Japarov öz çıxışında Emoməli Rəhmonu mühüm daxili siyasi hadisənin - Tacikistanda keçirilən parlament seçkilərinin uğurla keçirilməsi münasibətilə təbrik edib və Qırğızıstan tərəfinin seçki prosesinin təşkilini yüksək qiymətləndirdiyini, bunu beynəlxalq müşahidəçilər, o cümlədən Qırğızıstandan olan parlamentarilər tərəfindən də təsdiqləndiyini vurğulayıb.

Dövlət başçısı Tacikistan Respublikası ilə dostluq və mehriban qonşuluq münasibətlərinin inkişafının Qırğızıstan Respublikasının xarici siyasətinin əsas prioritetlərindən biri olduğunu qeyd edib:

“Ölkələrimizi qədim tarix, adət-ənənələr və mədəniyyət birləşdirir. Əsas aktual regional və beynəlxalq məsələlərdə oxşar mövqelərimiz var. Bütün bunlar qarşılıqlı faydalı əməkdaşlığın daha da möhkəmləndirilməsi üçün möhkəm zəmin yaradır. “Bizim birgə səylərimiz, siyasi iradəmiz və xalqlarımızın sülh və mehriban qonşuluq istəyi sayəsində biz konstruktiv qarşılıqlı fəaliyyət üçün birgə möhkəm zəmin yaradırıq”.

Bu kontekstdə o, Qırğızıstan-Tacikistan dövlət sərhədinin delimitasiyası və demarkasiyası üzrə Hökumət Komissiyalarının səmərəli fəaliyyətini xüsusi qeyd edib:

“Əminəm ki, Qırğızıstan və Tacikistan arasında dövlət sərhədi haqqında Müqavilənin imzalanması həm ölkələrimizin xalqları, həm də daha geniş beynəlxalq ictimaiyyət tərəfindən ruh yüksəkliyi ilə qarşılanacaq taleyüklü tarixi hadisə olacaq.

Bu addım təkcə dövlətlərimizin deyil, bütün Mərkəzi Asiya regionunun təhlükəsizliyinin, sabitliyinin və davamlı inkişafının möhkəmlənməsinə mühüm töhfə verəcək”.

Dövlət başçısı çıxışında həmçinin qeyd edib ki, ticarət-iqtisadi əməkdaşlığın inkişafı Qırğızıstan-Tacikistan münasibətlərində prioritet sahələrdən biridir. O, xüsusilə sərhəd nizamlanmasının uğurla başa çatması fonunda iki ölkə arasında ticarət dövriyyəsinin əhəmiyyətli dərəcədə artacağına ümid etdiyini bildirib.

Sonda Prezident Sadır Japarov bugünkü görüşün mehriban qonşuluq münasibətlərinin daha da möhkəmləndirilməsi, qarşılıqlı faydalı əməkdaşlığın inkişafı və Qırğızıstan və Tacikistan xalqlarının rifahına yönəlmiş birgə təşəbbüslərin həyata keçirilməsi istiqamətində növbəti mühüm addım olacağına əminliyini ifadə edib.


Anar Əliyev