"Son bir ildə 11 minə yaxın tələbənin təhsil haqqını ödəyə bilmədiyinə görə ali təhsillərini yarımçıq qoymağa məcbur olması və 64 orta məktəbin bağlanması həyacanvericidir. Bu ölkənin gələcəyi üçün da ciddi narahatlıqlar doğurur. Təhsil hər bir xalqın, hər bir dövlətin gələcəyidir və təhsilə, elmə diqqət yetirməmək gələcəyi düşünməmək deməkdir".

Bu fikirləri Newscenter.az-a AMİP liderinin köməkçisi, partiya Siyasi Şurasının üzvü Əli Orucov səsləndirib.

Partiya funksioneri daha sonra deyib:

"Təəssüflər olsun ki, təhsil sahəsində problemləri nəinki həll etmək mümkün olmayıb, əksinə bu sahədə vəziyyət ilbəil pisləşməyə doğru gedir. Hansısa məktəb direktorunu, yaxud müəllimi işdən çıxarmaqla, onları təhbeh etməklə neqativləri aradan qaldırmaq mümkün deyil. Hesab edirəm təhsil müəssisələrində çalışan müəllimlər mövcud şərtlər altında öz peşələrini maksimum icra etməyə çalışırlar. Ancaq təhsil sahəsində idarəetmədəki yarıtmazlıq, qeyri-peşəkarlıq onların da zəhmətini heçə endirir".

AMİP funksioneri deyib ki, hər bir baş verən insidentə görə məktəb rəhbərliyini və müəllimi cəzalandırmaq əksinə düzgün yol deyil və bu təlim-tərbiyənin keyfiyyətinə mənfi təsir göstərir:

"Təhsil elə bir sahədir ki, burada bütöv bir cəmiyyət iştirakçıdır və cəmiyyətin özündən də çox şeylər asılıdır. İnsanlar keyfiyyətsiz təhsilə görə təhsil ocaqlarını deyil, idarəçiləri məsul bilməlidir. Onlardan tələb etməlidir. Digər sahələrdə problemlərin həllinin gecikdirilməsi böyük fəsadlar verməz, ancaq təhsil sahəsində vəziyyəti düzəltmək üçün təxirəsalınmaz tədbirlər görülməlidir ki, gələcəyimizin etibarlı təminatına əmin ola bilək".

Süleyman