Türkiyənin hakim Ədalət və İnkişaf Partiyası ilə Özbəkistanın Liberal Demokrat Partiyası arasında əməkdaşlıq əlaqələri qurulur.

Newscenter.az "Sputnik Özbəkistan"a istinadən bildirir ki, bu məqsədlə Özbəkistan Liberal Demokrat Partiyası Siyasi Şurasının İcraiyyə Komitəsində Ədalət və İnkişaf Partiyasının sədr müavini Z.Sirakayanın rəhbərlik etdiyi Türkiyə nümayəndə heyətinin nümayəndələri ilə görüş keçirilib.

Görüşdə Özbəkistan Liberal Demokrat Partiyası–Sahibkarlar və İş Adamları Hərəkatının Siyasi Şurasının İcraiyyə Komitəsinin sədri A.Haitov iki ölkə arasında əlaqələrin davamlı şəkildə inkişaf etdiyini, Türkiyənin Özbəkistanın müstəqilliyini ilk tanıyan ölkə olduğunu və bu tarixi hadisədən sonra Türkiyə ilə Özbəkistan arasında dostluq əlaqələrinin bütün istiqamətlərdə geniş inkişaf etdiyini deyib.

Xüsusilə son səkkiz il ərzində Özbəkistan-Türkiyə münasibətləri tamamilə yeni keyfiyyət səviyyəsinə yüksəlib. Ölkədə türkiyəli tərəfdaşlarla birgə 100-dən artıq birgə layihə səmərəli şəkildə həyata keçirilir. Ümumilikdə 10 milyard dollar dəyərində perspektivli layihələr portfelinin formalaşması, qarşılıqlı ticarətin həcminin artması buna bariz nümunədir. Bundan əlavə, hər iki ölkənin beynəlxalq strukturlar çərçivəsində fəaliyyəti, xüsusən də Türk Dövlətləri Təşkilatı çərçivəsində səmərəli fəaliyyətləri iki xalqın bir-birinə daha da yaxınlaşmasına xidmət edir. Özbəkistan Prezidenti Şavkat Mirziyoyev ilə Türkiyə Prezidenti Rəcəb Tayyib Ərdoğan arasında qarşılıqlı etimada əsaslanan əlaqələr Özbəkistan və Türkiyə arasında bütün sahələrdə əməkdaşlığın sürətli inkişafı üçün möhkəm zəmin yaradır”, - deyə Haitov bildirib.

Görüşdə Özbəkistan və Türkiyənin aparıcı siyasi qüvvələrinin ikitərəfli əməkdaşlıq və yaxınlaşmaya yönəlmiş səylərə töhfə verməsinin məqsədəuyğunluğu müzakirə edilib. Bunun üçün partiyalararası əlaqələrin gücləndirilməsinin vacibliyi vurğulanıb. Hər iki tərəfin əhalinin rifah halının yaxşılaşdırılması, ölkələrin sosial-siyasi və iqtisadi inkişafının təmin edilməsi istiqamətində səylərinin bir-biri ilə uzlaşdığı, onların həyata keçirilməsində beynəlxalq əməkdaşlıq mexanizmlərindən istifadənin hər iki tərəf üçün faydalı olduğu vurğulanıb.

Görüşün sonunda hər iki tərəf arasında əməkdaşlığın daha da gücləndirilməsi və ona konkret məna verilməsi məqsədilə Anlaşma Memorandumu imzalanıb.

Sənəddə partiyanın iki ölkənin parlamentlərindəki deputat qrupları ilə yerli nümayəndəlik orqanları, gənclər və qadın qanadları və hər iki partiyanın analitik mərkəzləri arasında təcrübə mübadiləsi, əməkdaşlıq əlaqələrinin qurulması nəzərdə tutulur.

Süleyman