Qazaxıstanda tütün istehsalının həcminin kəskin artmasına baxmayaraq, ölkədə siqaret çəkənlərin payı 15%-ə düşüb.

Newscenter.az xəbər verir ki, bu barədə Energyprom.kz yazıb. Bildirilir ki, 2026-cı ilin yanvar-iyun aylarında ölkədə 14,2 milyard siqar, cherut, siqarillo, siqaret və papiros istehsal edilib. Bu, ötən ilin eyni dövrü ilə müqayisədə 35,2% çoxdur.

2024-cü ilin yanvar-iyun aylarında istehsal həcmi 7,6 milyard ədəd, 2025-ci ildə isə 10,5 milyard ədədə çatıb.

2026-cı ilin yanvar-may aylarında Qazaxıstan fabrikləri daxili bazarda satış və ixrac daxil olmaqla siqaret və papiroslara olan tələbatın 89,9%-ni təmin edib. Bir il əvvəl bu rəqəm 73,5% olub.

İstehsal olunan məhsulların əsas hissəsi ixrac edilib. 2026-cı ilin yanvar-may aylarında xaricə 6,7 milyard siqaret və papiros göndərilib. Bu, ötən illə müqayisədə 3,7 dəfə çoxdur. Əksinə, daxili bazarda satış həcmi 39,9% azalaraq 5,8 milyard ədəd təşkil edib.

İstehsal həcmlərinin artmasına baxmayaraq, Qazaxıstanda siqaret çəkənlərin nisbəti azalır. 2026-cı ilin məlumatlarına görə, 15 yaşdan yuxarı əhalinin 15,1%-i siqaret çəkir. 2025-ci ildə bu rəqəm 17,5%, 2024-cü ildə 20,7%, 2023-cü ildə isə 19,4% təşkil edib,

Ölkədə kişilərin 30,5%, qadınların isə 4,9%-i siqaret çəkir. 2025-ci ildə bu rəqəmlər müvafiq olaraq 34% və 5%, 2024-cü ildə isə 39,8% və 7,6% olub.

Süleyman