IV Şuşa Qlobal Media Forumunun təkcə beynəlxalq media tədbiri olmadığı getdikcə daha aydın görünür. Bu forum həm də Azərbaycanın xarici siyasət mesajlarını dünyaya çatdıran mühüm platforma rolunu oynayır. Prezident İlham Əliyevin çıxışı göstərdi ki, Azərbaycan artıq yalnız regional güc kimi deyil, qlobal proseslərdə təsiri artan ölkə kimi çıxış edir.
Forumda toxunulan əsas mövzulardan biri Azərbaycanın geosiyasi əhəmiyyətinin artması idi. Yaxın Şərqdəki gərginlik, Rusiya-Ukrayna müharibəsi və beynəlxalq nəqliyyat marşrutlarında baş verən dəyişikliklər Azərbaycanın rolunu daha da artırıb. Orta Dəhliz üzərində yerləşən Azərbaycan bu üstünlüyü illərlə qurduğu nəqliyyat infrastrukturu və balanslı xarici siyasəti sayəsində əldə edib. Bu gün ölkənin tranzit, enerji və logistika imkanları daha da genişlənir.
Forumda ABŞ, Avropa İttifaqı, Türkiyə və digər tərəfdaşlarla münasibətlərə dair verilən mesajlar da diqqət çəkdi. Vaşinqtonla strateji əməkdaşlığın genişlənməsi, Avropa Komissiyası ilə dialoqun fəallaşması və Türkiyə ilə müttəfiqliyin güclənməsi Azərbaycanın çoxşaxəli xarici siyasət kursunun davam etdiyini göstərir. Bu siyasət Bakıya müxtəlif güc mərkəzləri ilə eyni vaxtda əməkdaşlıq etməyə imkan verir.
Prezident sülh və təhlükəsizliklə bağlı da önəmli mesajlar verdi. Belə ki, Ermənistanla sülh sazişinin regionda yeni iqtisadi və nəqliyyat imkanları yaradacağı elan edildi. Rəsmi Bakı eyni zamanda beynəlxalq hüququn prinsiplərini və dövlətlərin ərazi bütövlüyünü əsas meyar kimi qəbul etdiyini bir daha açıqladı. Bu mövqe Azərbaycanın regional siyasətinin əsas istiqamətlərindən biri olaraq qalır.
Şuşa Forumu bir daha göstərdi ki, Azərbaycan artıq təkcə öz maraqlarını müdafiə edən ölkə deyil. O, regional sabitlik, enerji təhlükəsizliyi, nəqliyyat layihələri və diplomatik təşəbbüslərdə də fəal rol oynamağa çalışır. İndiki vəziyyət göstərir ki, Bakı dəyişən dünya nizamında mövqeyini daha da gücləndirmək niyyətindədir. Bu isə təqdirəlayiqdir.

Mütəllim Rəhimli