Beynəlxalq münasibətlər tarixində elə platformalar var ki, onların dəyəri keçirilən tədbirin miqyası ilə deyil, formalaşdırdığı siyasi və intellektual diskursla ölçülür. IV Şuşa Qlobal Media Forumu da məhz bu qəbildən olan hadisələrdəndir.

Şuşa bu dəfə təkcə coğrafi məkan deyil, qlobal informasiya axınının, siyasi dialoqun və geosiyasi müzakirələrin kəsişdiyi bir mərkəz kimi çıxış etdi. Müasir dövrdə informasiya artıq yalnız xəbərin ötürülməsi vasitəsi deyil; o, dövlətlərin yumşaq gücünün, diplomatik təsir imkanlarının və beynəlxalq legitimlik uğrunda mübarizəsinin mühüm elementidir. Bu baxımdan Şuşadan səslənən fikirlərin forumun keçirildiyi günlə məhdudlaşmayacağı, beynəlxalq media, ekspert dairələri və siyasi qərarvericilər arasında müzakirə mövzusu olacağı şübhə doğurmur.

Forumun ən mühüm məqamı Prezident İlham Əliyevin çıxışı və beynəlxalq media nümayəndələrinin suallarına verdiyi cavablar oldu. Bu çıxış yalnız suallara verilən operativ reaksiyalar deyildi; burada Azərbaycanın xarici siyasət fəlsəfəsini izah edən konseptual yanaşma nümayiş etdirildi.

Xüsusilə Ukrayna ilə bağlı səsləndirilən fikirlər beynəlxalq hüququn fundamental prinsiplərinə söykənən ardıcıl mövqenin ifadəsi kimi diqqət çəkdi. Azərbaycanın Ukraynanın ərazi bütövlüyünə dəstəyinin bir daha bəyan edilməsi və "işğalla barışmayın" mesajı təkcə konkret bir münaqişəyə münasibət deyil, dövlətlərin suverenliyi və ərazi bütövlüyünün beynəlxalq münasibətlər sisteminin dəyişməz prinsipləri olduğunu xatırladan hüquqi və siyasi mövqe idi.

Ümumilikdə isə forum zamanı verilən cavablar dünyada baş verən geosiyasi dəyişiklikləri anlamaq, beynəlxalq münasibətlərdə formalaşan yeni reallıqları oxumaq və Azərbaycanın bu proseslərə baxışını dərk etmək baxımından mühüm intellektual mənbə təsiri bağışladı.

Mənim diqqətimi cəlb edən əsas məqamlardan biri də Azərbaycanın xarici siyasətində prinsipiallığın və ardıcıllığın açıq şəkildə nümayiş etdirilməsi oldu. Dövlətlər beynəlxalq aləmdə ilk növbədə verdikləri sözə sadiqliyi, nümayiş etdirdikləri siyasi iradə və milli maraqlarını hansı prinsiplər əsasında müdafiə etmələri ilə etibar qazanırlar.

Azərbaycanın xarici siyasətində məhz bu xətt aydın görünür: beynəlxalq hüquqa söykənən mövqe, şəffaf diplomatik yanaşma, verilən bəyanatlarla praktik fəaliyyət arasında uyğunluq və hər şeydən üstün tutulan milli maraqlar. Məhz bu ardıcıllıq Azərbaycanın beynəlxalq tərəfdaşları üçün proqnozlaşdırıla bilən və etibarlı dövlət obrazını möhkəmləndirir.

Bu mənada IV Şuşa Qlobal Media Forumu sadəcə media tədbiri deyildi. O, Azərbaycanın dünyaya verdiyi siyasi, hüquqi və mənəvi mesajların ifadə olunduğu mühüm intellektual platforma idi. Bəzən dövlətlərin gücü yalnız iqtisadi və hərbi potensialı ilə deyil, söylədiyi sözün çəkisi, müdafiə etdiyi prinsiplərin ardıcıllığı və bu prinsiplərin arxasında qətiyyətlə dayanmaq iradəsi ilə ölçülür. Məncə, Şuşadan verilən mesajların əsas mahiyyəti də məhz bundan ibarət idi.

Səftər Rəhimli