Newscenter.az.2.05.2019. Vətəndaşların rahat gediş-gəlişini təmin etmək, o cümlədən nəqliyyat sıxlığının azaldılması istiqamətində dövlət başçısının tapşırıq və sərəncamlarına əsasən, Yasamal rayonu, İsmayıl bəy Qutqaşınlı küçəsinin bir hissəsində aparılan təmir işləri yekunlaşdırılıb. Newscenter.az-a Avtomobil Yolları Dövlət Agentliyindən bildirilib ki, təmir işləri küçənin 130 metrlik hissəsini əhatə edib.

Aparılan təmir işləri çərçivəsində köhnə asfalt beton örtüyünün üst qatı frezlənərək kənara daşınıb, köhnə səki daşları sökülüb, zəruri yerlərdə əsasın deformasiyaya uğramış hissələri bərpa olunub və və hamarlayıcı lay asfalt-beton örtüyü döşənib.

“İnşaat Norma və Qaydaları”nın tələblərinə əsasən daha sonra yola yeni asfalt-beton örtüyünün döşənməsi işləri görülüb. Asfaltlanma işləri ümumilikdə 2 min kv.m-ə yaxın sahəni əhatə edib.

Bundan başqa aparılan yenidənqurma zamanı kommunikasiya xətlərinin baxış qapaqları dəyişdirilib, zəruri yerlərdə köhnə səki daşları sökülərək yeniləri ilə əvəzlənib.
Anar