“Bakı Metropoliteni” QSC-nin “20 Yanvar” stansiyasında işıqlandırma sistemləri yenilənib.

Bu barədə Newscenter.az-a qurumun mətbuat xidmətindən məlumat verilib.

Bildirilir ki, yeniləmə tədbirləri stansiyanın platforma və vestibülündə aparılıb. Burada işıqlanma sisteminin qulluğu çətinləşdiyi, kifayət qədər böyük əmək qüvvəsi və müntəzəm nəzarət tələb etdiyi üçün dövrün standartlarına cavab vermirdi. Yeni müasir və qənaətcil led lampalar stansiyanın platformasını tam əhatə edib. Hərəkətin təhlükəsizliyinə və sərnişindaşıma prinsiplərinə maneə törətməmək üçün işlər müvəqqəti işıqlanma təmin edilməklə, gecə növbəsində təşkil olunub.

Platforma tavanında enerji sərfiyyatı daha çox olan köhnəlmiş 72 Vt-lıq (biri 36 vatt olan cüt lampa) 128 lampa çıxarılıb. Onların əvəzinə 48 Vt-lıq panel formalı 96 led lampa düzülüb. Vestibüldə də hər biri 36 vatt olmaqla 72 ədəd cüt lampa çıxarılıb, əvəzinə 60 ədəd 48 Vt-lıq lampa quraşdırılıb. Yeni lampalar daha qənaətcil, əlverişli olmaqla, memarlıq üslubu ilə seçilən stansiyada yüksək səviyyəli işıqlandırmanı təmin edir. Burada tavan, sütunlar və stansiya yolunu əhatə edən memarlıq ansamblı yeni işıqlanma sisteminin ahəngi ilə yeni çalar qazanıb. Qulluğu asan olmaqla, keyfiyyəti və istismar müddəti daha uzundur.

Son aylar metronun “Cəfər Cabbarlı” stansiyasının əsaslı təmir olunmuş bir platformasının, eləcə də “Nizami” və “Elmlər Akademiyası” stansiyalarının işıqlandırma sistemləri dəyişdirilib.

Aysu