Azərbaycan Respublikası Kənd Təsərrüfatı Nazirliyi, Heyvandarlıq Elmi Tədqiqat İnstitutu və Türkiyə Respublikası Selçuk Universitetinin birgə təşkilatçılığı ilə Heyvandarlıq Elmi Tədqiqat İnstitutunda “Qoyunçuluğun problemləri. Yun istehsalı, emalı və marketinqi” mövzusunda elmi-praktiki konfrans keçirilib.
Newscenter.az xəbər verir ki, konfransda Göygöl Rayon İcra Hakimiyyətinin başçısı Elvin Pashayev , Heyvandarlıq Elmi Tədqiqat İnstitutunun direktoru Mahir Hacıyev, Azərbaycan MilliXalça Muzeyinin direktoru Şirin Məlikova, “Azərxalça” ASC-nin istehsalat üzrə direktoru Əlisəfa Nuriyev, KOBİA-nın Gəncə-Qazax regionu üzrə koordinatoru Anar Əliyev və Türkiyə Respublikası Selçuk Universitetinin dosenti dr. Esad Sami Polat iştirak edib.
Konfransı giriş sözü ilə Göygöl Rayon İcra Hakimiyyətinin başçısı Elvin Paşayev açdı. O, qoyunçuluğun mövcud vəziyyəti, yun istehsalında olan problemlər barədə məlumat verdi, Göygöl rayonunda fermer və sahibkarların qoyunçuluğa olan marağından bəhs etdi. Daha sonra Dövlətin qoyunçuluğa, ümumən kənd təsərrüfatına göstərdiyi diqqət və qayğıdan söz açdı, edilən güzəştlər, verilən subsidiyalar, sahənin inkişafı üçün həyata keçirilən layihələrin zəruriliyini xüsusən vurğuladı. Çıxışının sonunda bir daha iştirakçıları və qonaqları salamladı, konfransa işində uğurlar arzu etdi.
Daha sonra institutun direktoru Mahir Hacıyev ölkədə xırdabuynuzlu heyvandarlığın mövcud vəziyyəti haqqında statistik məlumatları konfrans iştirakçılarının diqqətinə çatdırıb, yerli qoyun cinsləri, eyni zamanda qoyunçuluğun inkişafı istiqamətində Heyvandarlıq Elmi Tədqiqat İnstitutunun gördüyü işlər, həyata keçirdiyi layihələr barədə ətraflı məlumat verdi.
Sonra çıxış üçün söz Azərbaycan Milli Xalça Muzeyinin direktoru Şirin Məlikovaya verilib. Şirin Məlikova Azərbaycan xalçalarının xüsusiyyətləri, onlarrın azırlanmasında istifadə olunan yun növləri və texnologiyaları haqqında, həmçinin yerli qoyun cinslərinin yunlarının xüsusiyyətləri və onların emal üsulları barədə zəngin təqdimatla çıxış etdi.
Sonra söz “Azərxalça” ASC-nin istehsalat üzrə direktoru Əlisəfa Nuriyevə verildi. Əlisəfa Nuriyev milli mədəniyyətimizdə xalçaçılığın rolu, ölkəmizdə xalçaçılığın tarixi, bu sahədə mövcud olan poblemlər və həll yolları barədə geniş nitqlə çıxış etdi.
Yekun olaraq çıxış üçün söz Selçuk Universitetinin dosenti dr. Esad Sami Polata verildi. Esad Sami Polat yun, onun növləri, yun emalında istifadə edilən Türkiyə təcrübəsi və dünya təcrübəsi barədə, habelə yundadn alınan məhsullar, onların tərkibi, əhəmiyyəti və tətbiq barədə geniş təqdimatla çıxış etdi.
Konfransın yekununda konfrans iştirakçıları və qonaqlar Heyvandarlıq Elmi Tədqiqat İnstitutunun həyətində təşkil edilmiş yun nümunələrindən hazırlanmış məsullara, yundan alınan keratinə, kosmetik vasitələrə, müxtəlif yunçuluq məmulatlarına, eyni zamanda institutun Yardımçı Təcrübə Təsərrüfatında saxlanılan yerli və xarici cinsli qoyunlara baxış keçirdilər.
Natiq Orucov
