Gürcüstan prezidenti Mixeil Kavelaşvilinin Azərbaycana iki günlük rəsmi səfəri başa çatdı. Səfər çərçivəsində keçirilən tədbir və görüşlər onu deməyə əsas verir ki, iki ölkə arasında dostluq və əməkdaşlıq istiqamətində münasibətlər yeni inkişaf mərhələsinə qədəm qoyur.

Newscenter.az xəbər verir ki, bu fikirləri siyasi ekspert Çingiz Şahbazi səsləndirib. Onun sözlərinə görə, hər iki ölkə başçısının görüşdən sonra keçirdikləri mətbuat konfransına nəzər salsaq və hər iki liderin səsləndirdiyi bəyanatlara diqqət yetirsək məlum olur ki, səfər, siyasi və iqtisadi baxımdan əlaqələrin daha da inkişaf etdirilməsi və Cənubi Qafqazda mövqelərin daha da möhkəmlənməsinə imkanları artıracaq:

"Məlumdur ki, Gürcüstanla Azərbaycanın dövlətlərarası və xalqlar arasında dərin münasibətlərinin böyük tarixi vardır. Bu tarix hər iki ölkə üçün bütün dönəmlərdə xüsusi əhəmiyyət kəsb edib. Münasibətlərin dostluq və əməkdaşlıq, xüsusilə də iqtisadi baxımdan strateji tərəfdaşlıq müstəvisində davam etməsi bizə əsas verir qeyd edək ki, Gürcüstan Azərbaycanın yaxın dostudur, xoş münasibətli qonşudur və strateji əhəmiyyətli müttəfiqdir. Bu baxımdan səfər zamanı iki ölkə arasında strateji tərəfdaşlığın əsas istiqamətləri, gömrük, dəmir yolu, limanlar, Orta Dəhliz və digər iqtisadi və siyasi sferada məsələlər yenidən ələ alınıb. Dünyada və regionda cərəyan edən proseslər müzakirə olunub".

Ekspert deyib ki, dünyada baş verən gərginlik və müharibələr fonunda Cənubi Qafqazın rolu və sabitliyin qorunub saxlanması istiqamətində birlikdə atıla bilinəcək addımlar, iki ölkə lideri arasında danışıqlar predmeti olub:

"Hər iki ölkə başçısının, Cənubi Qafqazda sülhün və təhlükəsizliyin zəmanəti olaraq , əmin-amanlığın qorunması istiqamətində bəyanatları səsləndirildi. Cənubi Qafqazın bundan sonra münaqişə və müharibə meydanına çevrilməməsi istiqamətində hər iki ölkə lideri maraqli olduqlarını qeyd etdilər. Düşünürəm ki, bundan sonrakı dönəmdə səfər zamanı əldə olunan nəticələr, hər iki ölkə və xalqlar üçün faydalı olacaqdır və qonşuluq, dostluq münasibətlərinin daha da inkişaf edəcəyinə, təkan verəcəkdir".

Anar Əliyev