"Naxçıvan Muxtar Respublikası ərazisinə yönəldildiyi bildirilən pilotsuz uçuş aparatının hücumu regional təhlükəsizlik baxımından ciddi hüquqi və siyasi qiymətləndirmə tələb edən hadisədir. Əgər bu hücumun İran İslam Respublikası ərazisindən və ya həmin dövlətin nəzarətində olan subyektlər tərəfindən həyata keçirildiyi təsdiq olunarsa, bu hal beynəlxalq hüququn əsas norma və prinsiplərinin pozulması kimi qiymətləndirilə bilər. Beynəlxalq hüququn fundamental prinsiplərindən biri dövlətlərin suverenliyi və ərazi bütövlüyünə hörmət edilməsidir".

Newscenter.az xəbər verir ki, bunları hüquqşünas Əli İbrahimov deyib. O bildirib ki, bu prinsip xüsusilə Birləşmiş Millətlər Təşkilatının Nizamnaməsində təsbit olunmuşdur:

"Həmin norma dövlətlərə qarşı güc tətbiqini və ya güc tətbiqi ilə hədələməyi qadağan edir. Digər dövlətin ərazisinə qarşı hərbi xarakterli vasitələrin, o cümlədən pilotsuz uçuş aparatlarının tətbiqi həmin qadağanın pozulması kimi qiymətləndirilə bilər. Bundan əlavə, dövlətlərin beynəlxalq məsuliyyəti ilə bağlı qəbul olunmuş ümumi hüquqi prinsipə görə, bir dövlətin ərazisindən digər dövlətə qarşı qanunsuz hərəkətlər həyata keçirilirsə və həmin dövlət bunun qarşısını almırsa və ya bu hərəkətlər dövlət strukturları ilə əlaqəlidirsə, həmin dövlət beynəlxalq hüquqi məsuliyyət daşıya bilər. Bu yanaşma dövlət məsuliyyəti haqqında beynəlxalq hüququn qəbul olunmuş doktrinalarında və beynəlxalq məhkəmə praktikasında da öz əksini tapır. Mülki infrastruktura və ya mülki şəxslərin istifadəsində olan obyektlərə qarşı yönəlmiş hücumlar isə beynəlxalq humanitar hüququn əsas prinsiplərindən biri olan mülki əhalinin qorunması prinsipinə ziddir. Belə hərəkətlər regionda sabitliyin pozulmasına, gərginliyin artmasına və təhlükəli presedentlərin yaranmasına səbəb olur".

Hüquqşünas qeyd edib ki, Azərbaycan Respublikası beynəlxalq hüququn subyekti kimi öz suverenliyini, ərazi bütövlüyünü və vətəndaşlarının təhlükəsizliyini qorumaq hüququna malikdir:

"BMT Nizamnaməsinə əsasən, dövlətlər silahlı hücuma məruz qaldıqda fərdi və ya kollektiv özünümüdafiə hüququndan istifadə edə bilərlər. Bu baxımdan Azərbaycan dövləti beynəlxalq hüququn norma və prinsiplərinə uyğun şəkildə öz milli təhlükəsizliyini təmin etmək və gələcəkdə bu kimi təxribatların qarşısını almaq üçün zəruri hüquqi və diplomatik tədbirlər görmək səlahiyyətinə malikdir. Regionda uzunmüddətli sabitliyin təmin olunması isə yalnız dövlətlərin qarşılıqlı suverenliyinə hörmət etməsi, beynəlxalq hüquqa riayət etməsi və gərginliyi artıran addımlardan çəkinməsi ilə mümkündür".

Süleyman