Qırğızıstan Respublikasının Prezidenti Sadır Japarov Türkiyə Böyük Millət Məclisinin deputatı, Ədalət və İnkişaf Partiyasının sədr müavini, Türk Dövlətləri ilə Əlaqələr Departamentinin rəhbəri Kürşad Zorlunu qəbul edib.
Newscenter.az Qırğızıstan Prezidentinin mətbuat xidmətinə istinadən bildirir ki, görüşdə tərəflər Qırğızıstan-Türkiyə strateji tərəfdaşlığının aktual məsələlərini, parlamentlərarası qarşılıqlı əlaqələrin inkişafını, eləcə də siyasi, ticarət-iqtisadi və mədəni-humanitar sahələrdə əməkdaşlığın dərinləşdirilməsi perspektivlərini müzakirə ediblər.
Prezident Sadır Japarov Qırğızıstanın Türkiyə ilə etibarlı tərəfdaşlığın möhkəmləndirilməsinə xüsusi diqqət yetirdiyini və dostluq və qardaşlıq əsasında qurulmuş dövlətlərarası münasibətlərimizə yüksək qiymət verdiyini vurğulayıb. Qeyd edib ki, Ali Şura ilə Türkiyə Böyük Millət Məclisi arasında münasibətlər durmadan inkişaf edir.
Öz növbəsində, Türkiyə Böyük Millət Məclisinin deputatı Kürşad Zorlu Prezident Sadır Japarova səmimi qəbula görə təşəkkür etdi və Prezident Rəcəb Tayyib Ərdoğanın salamlarını çatdırdı. O, uzun illərdir Qırğızıstanın inkişafını yaxından izlədiyini və Qırğızıstan-Türkiyə münasibətlərinin güclənməsini görməkdən məmnun olduğunu bildirib.
Kürşad Zorlu son illərdə iki qardaş ölkə arasında əməkdaşlığın tamhüquqlu strateji tərəfdaşlıq səviyyəsinə çatdığını və bunun müxtəlif sahələrdə qarşılıqlı əlaqələrin dərinləşdirilməsi üçün yeni imkanlar açdığını vurğulayıb.
O, ticarət-iqtisadi münasibətlərin müsbət dinamikasını qeyd edib və iki ölkə rəhbərliyinin birgə səyləri sayəsində hazırda təxminən 1,6 milyard dollar təşkil edən qarşılıqlı ticarət həcminin gələcəkdə 5 milyard dollara qədər arta biləcəyinə əminliyini ifadə edib.
O, həmçinin Qırğızıstan Respublikasını 2027-2028-ci illər üçün BMT Təhlükəsizlik Şurasının qeyri-daimi üzvü seçilməsi münasibətilə təbrik edib.
Görüş nəticəsində tərəflər Qırğızıstan-Türkiyə strateji tərəfdaşlığının daha da dərinləşdirilməsində və qarşılıqlı maraq doğuran bütün sahələrdə əməkdaşlığın genişləndirilməsində qarşılıqlı maraqlarını təsdiqləyiblər.
Süleyman
