Özbəkistanın dövlət borcu 2026-cı ilin birinci yarısının sonunda 48,315 milyard dollara çatıb.

Newscenter.az "Sputnik Özbəkistan"a istinadən bildirir ki, bu barədə İqtisadiyyat və Maliyyə Nazirliyinin dərc etdiyi dövlət borcu statistikasında bildirilib.

Qeyd edilib ki, 2026-cı ilin əvvəlində Özbəkistanın dövlət borcu 46,85 milyard dollar təşkil edib. İlin birinci yarısında təxminən 1,47 milyard dollar və ya 3,1% artıb.

Hesabat dövrünün sonunda dövlətin xarici borcu 40,71 milyard dollara çatıb. Bu, ümumi dövlət borcunun təxminən 84%-ni təşkil edir. İlin əvvəlindən bəri xarici öhdəliklər təxminən 890 milyon dollar və ya 2,2% artıb.

Dövlətin daxili borcu 7,6 milyard dollar təşkil edib. Yarım ildə təxminən 570 milyon dollar artıb.

Məlumata görə, son illərdə Özbəkistanın dövlət borcu durmadan artmaqdadır. Onun həcmi 2019-cu ildə 17,8 milyard dollar, 2020-ci ildə 23,4 milyard dollar, 2021-ci ildə 26,3 milyard dollar, 2022-ci ildə 29,2 milyard dollar, 2023-cü ildə 34,5 milyard dollar və 2024-cü ildə 40,2 milyard dollar təşkil edib. 2025-ci ilin sonunda bu rəqəm 46,85 milyard dollara çatıb.

Beləliklə, dövlət borcu 2019-cu ildən bəri təxminən 2,7 dəfə artıb. Yeni hesabata görə, dövlətin xarici borcunun ən böyük hissəsi — 20,53 milyard dollar — büdcənin dəstəklənməsi üçün yönəldilib.

Ən böyük kreditorlar arasında Dünya Bankı (9,12 milyard dollar), Asiya İnkişaf Bankı (8,18 milyard dollar), Çin (3,89 milyard dollar) və Yaponiya (3,09 milyard dollar) maliyyə institutları var. Beynəlxalq istiqraz öhdəlikləri 6,78 milyard dollar təşkil edib.

Süleyman