"20 Yanvar tariximizin unudulmaz qəhrəmanlıq salnaməsidir. Həmin gün Azərbaycan xalqı özünün yenilməzliyini, müstəqillik uğrunda mübarizə əzminin sarsılmazlığını bütün dünyaya sübut etdi. Xalqımızın suverenlik uğrunda apardığı mücadilə öz nəticəsini verdi".

Newscenter.az xəbər verir ki, bu fikirləri Milli Məclisin deputatı İlham Məmmədov səsləndirib. O bildirib ki, uzun illər həsrətində olduğumuz müqəddəs arzuya, milli azadlığa qovuşduq:

“20 Yanvar faciəsinin 35-ci ildönümünü qeyd etdiyimiz bu günlərdə biz ötən illəri xatırlamalı, xalqımızın ağır sınaqlardan necə şərəflə çıxdığını iftixar hissi ilə qeyd etməliyik. Xüsusilə qeyd olunmalıdır ki, Ümummilli Liderimiz Heydər Əliyevin zəngin siyasi təcrübəsi, dövlətçilik məharəti, cəsarətli addımları sayəsində Azərbaycanda anarxiyanın, xaosun kökü kəsildi, sabitlik bərqərar oldu, Ermənistanla müharibədə atəşkəsə nail olundu, xalqımızın sınmış inamı özünə qaytarıldı, Azərbaycan fəlakət təhlükəsindən xilas olaraq sabit və rəvan yola qədəm qoydu. Eyni zamanda dahi Heydər Əliyevin böyük cəsarəti ilə 20 Yanvar faciəsinə hüquqi-siyasi qiymət verildi".

Deputat qeyd edib ki, lakin bütün bunlar asanlıqla başa gəlmədi:

"Ulu Öndərimizin hakimiyyəti dövründə 1994-cü ilin oktyabr, 1995-ci ilin mart aylarında dövlət çevrilişlərinin qarşısı mərdliklə alındı, ayrı-ayrı siyasi qruplara və şəxslərə xidmət edən müxtəlif silahlı dəstələr ləğv edildi, milli ordu yaradıldı və ordumuzda hərbi vətənpərvərlik, Vətənə və torpağa sədaqət, milli qürur hissi gücləndirildi. Həmin yenilməz Ordu Müzəffər Ali Baş Komandan cənab İlham Əliyevin peşəkar rəhbərliyi altında Azərbaycanın ərazi bütövlüyünü və suverenliyini tam şəkildə təmin etdi. Bu gün əminəm ki, bütün şəhidlərimizin əziz ruhu şaddır, ona görə ki, onların qisası alınıb, Azərbaycan tam müstəqil və azad ölkədir. Allah bütün şəhidlərimizə rəhmət eləsin".

Süleyman