"Ermənistanın baş naziri Nikol Paşinyanla Rusiya Prezidenti Vladimir Putin arasında keçirilən telefon danışığı Moskva–Yerevan münasibətlərində mövcud gərginliyin davam etdiyini göstərir. Diqqət çəkən məqamlardan biri Putinin Paşinyanı yenidən baş nazir seçilməsi münasibətilə açıq şəkildə təbrik etməməsi oldu".

Newscenter.az xəbər verir ki, bunları siyasi şərhçi Məhəmməd Əsədullazadə deyib. O bildirib ki, müzakirələr zamanı Putin Rusiyanın Ermənistandan geosiyasi seçim etməsini istədiyi, yəni Avrasiya İqtisadi İttifaqı ilə inteqrasiyanı davam etdirmək, yoxsa Avropa İttifaqına yaxınlaşmaq arasında aydın mövqe nümayiş etdirməsini şərt kimi irəli sürüb:

"Bun da Moskvanın İrəvana siyasi təzyiqləri artırmaq niyyətində olduğunu göstərir. V. Putinin N. Paşinyandan Avropa İttifaqı ilə bağlı referendum tələb etməsi bir növ bu ölkənin daxili işlərinə qarışmaqdan ibarətdir.

Ermənistanın Avropa ilə siyasi münasibətlərini dərinləşdirməsi fonunda Rusiya ilə əvvəlki səviyyədə strateji tərəfdaşlığı qoruması getdikcə çətinləşir. Moskvanın bu prosesə iqtisadi rıçaqlarla, o cümlədən enerji siyasəti və qazın qiyməti kimi vasitələrlə təsir göstərməsi gözlənilir. Danışıqlar zamanı Ermənistandan müxalifətə qarşı aparılan hüquqi proseslərin, müxalifət ətrafında yaranmış vəziyyətə son qoyması tələb edilib".

Məhəmməd Əsədullazadə qeyd edib ki, hazırkı mərhələdə Rusiya–Ermənistan münasibətləri son illərin ən mürəkkəb dövrlərindən birini yaşayır:

"Bununla belə, Paşinyan hökumətinin Qərblə siyasi və iqtisadi əməkdaşlığı genişləndirmək kursunu davam etdirəcəyi gözlənilir. Rusiya isə öz növbəsində siyasi və iqtisadi təzyiq vasitələrindən istifadə edəcək. Ermənistana pul köçürmələri də artıq dayandırılıb. Əgər Moskva ilə İrəvan arasında gərginlik daha da dərinləşərsə, Ermənistanın Avrasiya İqtisadi İttifaqındakı fəaliyyəti dayanacaq. Həmçinin Ermənistan MDB və KTMT-ni tərk etməsi mümkündür".

Süleyman