"Son günlər cəmiyyətdə geniş əks-səda doğuran və Ramiz Mehdiyevin qanun qarşısında cavab verməsi ilə nəticələnən hüquqi proses bir daha sübut etdi ki, bu ölkədə heç kim toxunulmaz deyil və dövlətin təməllərinə qəsd edən hər bir kəs, keçmiş xidmətlərindən və daşıdığı statusdan asılı olmayaraq, öz layiqli cəzasını alacaqdır.

Bu hadisəyə siyasi və hüquqi müstəvidə yanaşdıqda, qarşılaşdığımız mənzərə sadəcə bir məmurun həbsi deyil, dövlət maraqlarının qorunması naminə atılan barışmaz və qətiyyətli bir addımdır".

Newscenter.az xəbər verir ki, bunları Milli Məclisin deputatı İlham Məmmədov səsləndirib. O qeyd edib ki, dövlətçilik fəlsəfəsinin ən fundamental prinsipi sadiqlikdir:

"İllərlə yüksək dövlət vəzifələrində əyləşib, dövlətin verdiyi imkanlardan və etibardan sui-istifadə edərək pərdəarxası oyunlar qurmaq, milli maraqlara zərbə vuracaq fəaliyyətlərlə məşğul olmaq ən ağır cinayətdir. Azərbaycan dövləti hər bir səhvi və ya nöqsanı zamanla bağışlaya bilər, lakin dövlətin varlığına, suverenliyinə və daxili sabitliyinə yönəlmiş xəyanəti heç vaxt bağışlamır və bağışlamayacaq. Ramiz Mehdiyevin timsalında qanunun kəsərini görmək, bütün "toxunulmazlıq" xülyalarına birdəfəlik son qoydu".

İlham Məmmədov qeyd edib ki, hüquqi dövlətin ən mühüm göstəricisi qanunun hər kəs üçün bərabər tətbiq olunmasıdır:

"Uzun illər sistem daxilində müəyyən güc mərkəzi yaratmağa çalışan, özünü qanunlardan və hesabatlılıqdan uzaq hesab edən fiqurların ifşası Azərbaycanın hüquq sistemi üçün mühüm bir sınaq və zəfərdir. Heç bir keçmiş xidmət, status və ya yaş dövlətə xəyanət ittihamı qarşısında sipər ola bilməz. Ədalət gec-tez yerini tapır və hər kəs əməllərinin hüquqi bədəlini ödəməlidir".

Süleyman