Müasir beynəlxalq münasibətlər sistemində baş verən dəyişikliklər dövlətlərin qarşısında yeni çağırışlar yaradır. Müharibələrin davam etdiyi, beynəlxalq hüququn tətbiqində ziddiyyətlərin dərinləşdiyi və qlobal təhlükəsizlik mexanizmlərinin səmərəliliyinin müzakirə olunduğu bir dövrdə Azərbaycanın keçdiyi yol xüsusi əhəmiyyət daşıyır. Prezident İlham Əliyevin VII Ümumdünya Mədəniyyətlərarası Dialoq Forumunda səsləndirdiyi fikirlər ölkəmizin tarixi təcrübəsini, milli iradəsini və beynəlxalq münasibətlərə yanaşmasını aydın şəkildə ortaya qoyur.
Azərbaycanın inkişafının təməlində milli birlik, dövlət müstəqilliyinə sadiqlik və tarixi dəyərlərin qorunması dayanır. Əsrlər boyu müxtəlif mədəniyyətlərin qovuşduğu ölkəmiz multikulturalizm və dini dözümlülük ənənələrini qoruyaraq müasir dövlətçilik modelini formalaşdırıb. Azərbaycançılıq ideyası ətrafında birləşən cəmiyyətin həmrəyliyi isə ölkənin ən çətin tarixi sınaqlarından keçməsində mühüm rol oynayıb. Bu iradənin ən mühüm təzahürü Azərbaycanın ərazi bütövlüyünü və suverenliyini bərpa etməsi oldu. Uzun illər davam edən danışıqların nəticəsiz qalması və BMT Təhlükəsizlik Şurasının qətnamələrinin icra olunmaması beynəlxalq hüququn tətbiqindəki problemləri üzə çıxardı. Azərbaycan özünümüdafiə hüququna əsaslanaraq torpaqlarını işğaldan azad etdi və bundan sonra Ermənistanla sülh təşəbbüsü ilə çıxış etdi. Bu ardıcıllıq ölkənin öz milli maraqlarını müdafiə etməklə yanaşı, regionda davamlı sülhün formalaşmasına da önəm verdiyini göstərir.
Cənab Prezidentin çıxışında xüsusi vurğulanan məsələlərdən biri ikili standartlardır. Beynəlxalq hüququn ayrı-ayrı dövlətlərə münasibətdə fərqli tətbiqi ədalət prinsipini zəiflədir və beynəlxalq təşkilatların qərarlarına olan etimadı sarsıdır. Dövlətlərin suverenliyinə hörmət, qarşılıqlı bərabərlik və qəbul edilmiş qərarların icrası beynəlxalq münasibətlərin əsas prinsipləri olmalıdır.
Bu gün Azərbaycanın beynəlxalq mövqeyi yalnız hərbi-siyasi nəticələrlə deyil, iqtisadi potensialı, enerji təhlükəsizliyinə töhfəsi, nəqliyyat bağlantıları və genişlənən tərəfdaşlıqları ilə də müəyyən olunur. Mədəniyyətlərarası dialoqun təşviqi isə ölkəmizin müxtəlif xalqlar və dövlətlər arasında əməkdaşlığa verdiyi əhəmiyyətin göstəricisidir. Qlobal qeyri-sabitliyin artdığı bir şəraitdə Azərbaycanın qarşısında duran əsas vəzifə müstəqil siyasətini davam etdirmək, əldə edilmiş nailiyyətləri qorumaq və sülhün möhkəmlənməsinə töhfə verməkdir. Prezident İlham Əliyevin çıxışında ifadə olunan yanaşma da bu əsas ideyanı ön plana çıxarır: dövlətin gələcəyi milli birlikdən, suverenliyə sadiqlikdən və dəyişən beynəlxalq şəraitdə öz maraqlarını ardıcıl müdafiə etmək iradəsindən keçir.
Beləliklə, Azərbaycanın keçdiyi tarixi yol bir daha göstərir ki, milli birlik, dövlət müstəqilliyi və qətiyyətli mövqe ölkənin gələcəyini müəyyən edən əsas amillərdir. Dəyişən dünya nizamında Azərbaycanın qarşısında duran başlıca vəzifə əldə olunmuş nailiyyətləri qorumaq, milli maraqları müdafiə etmək və daha güclü gələcək naminə inamla irəliləməkdir. Çünki bütün siyasi qərarların, həyata keçirilən islahatların və qarşıya qoyulan hədəflərin mərkəzində Azərbaycan dövlətinin qüdrəti və xalqımızın rifahı dayanır.
Ramil Hüseynov, "Yeni Xətt" Siyasi Tədqiqatlar Mərkəzinin rəhbəri
