"Müasir dünya coğrafi baxımdan bir-birinə nə qədər yaxınlaşıbsa, mənəvi və siyasi baxımdan bir o qədər uzaqlaşıb. Qloballaşma texnoloji sərhədləri silsə də, cəmiyyətlər arasında yeni və daha görünməz divarların ucalmasının qarşısını ala bilmədi. Bu gün bəşəriyyət yalnız iqtisadi və ya hərbi böhranlarla deyil, həm də köklü bir etimad və anlaşma qıtlığı ilə üz-üzədir. Belə bir tarixi məqamda Bakıda keçirilən VII Ümumdünya Mədəniyyətlərarası Dialoq Forumu, dünyaya sadəcə bir dialoq platforması deyil, həm də gələcəyin sülh modelini təklif edir".

Newscenter.az xəbər verir ki, bunları YAP Yevlax rayon təşkilatının fəalı Zülfiyyə Bayramlı deyib. Onun sözlərinə görə, uzun illərdir ki, Azərbaycanın təşəbbüsü ilə həyata keçirilən "Bakı Prosesi" qlobal humanitar diplomatiyanın ən uğurlu nümunələrindən birinə çevrilmişdir:

"Bu proses fərqli dinlərin, mədəniyyətlərin və ideologiyaların toqquşma nöqtəsini deyil, uzlaşma məkanını tapmağı hədəfləyir. Dünyanın müxtəlif qitələrindən gələn liderlərin, mütəfəkkirlərin və beynəlxalq təşkilatların nümayəndələrinin məhz Bakıda bir araya gəlməsi təsadüfi xarakter daşımır. Bu, Azərbaycanın əsrlər boyu qoruyub saxladığı daxili multikultural mühitinin xarici siyasətdəki təbii proeksiyasıdır".

Hakim partiya təmsilçisi qeyd edib ki, Forumun açılışında Ölkəmizin Prezidenti, Müzəffər Ali Baş Komandan cənab İlham Əliyevin çıxışı müasir beynəlxalq münasibətlər sisteminin reallıqlarını aydın şəkildə meydana çıxardı:

"Azərbaycan Prezidentinin vurğuladığı əsas mesajlar sadəcə region üçün deyil, qlobal auditoriya üçün gələcəyə baxış bucağını müəyyən edən fundamental bir manifest xarakteri daşıyırdı. Xüsusilə, Azərbaycanın öz ərazi bütövlüyünü bərpa etdikdən sonra irəli sürdüyü ədalətli və davamlı sülh prinsipləri, Cənubi Qafqazda formalaşan yeni əməkdaşlıq mühiti beynəlxalq hüququn gücünü və səmimi dialoqun vacibliyini bir daha təsdiq etdi.

UNESCO, BMT-nin Sivilizasiyalar Alyansı, ICESCO kimi nüfuzlu təşkilatların bu foruma verdiyi institusional dəstək tədbirin qlobal çəkisini göstərir. Bu tərəfdaşlıq sübut edir ki, Bakı Forumu qlobal güclərin maraq toqquşmalarından uzaq, bəşəri dəyərlərin ön plana çəkildiyi obyektiv bir platformadır. Müasir dünyada hərbi ittifaqların rəqabəti fonunda belə humanitar körpülərin qorunub saxlanılması gələcək nəsillərin təhlükəsizliyi üçün yeganə çıxış yoludur".

Süleyman