Litva Respublikasının Baş naziri Mindaugas Sinkeviçyus ilə Prezident İlham Əliyev arasında baş tutan telefon danışığı ilk növbədə Azərbaycanın siyasi-hüquqi və beynəlxalq normalara söykənən çoxvektorlu xarici siyasət kursu, Vətən müharibəsində qazanılmış tarixi Zəfərdən sonra Cənubi Qafqazda və daha geniş geostrateji məkanda formalaşan yeni reallıqlar fonunda keyfiyyətcə yeni mərhələyə qədəm qoymasında ehtiva olunan dinamikanın və ölkəmizin Avropa məkanındakı artan diplomatik çəkisinin bariz təzahürüdür. Dövlətlərin suverenliyi, ərazi bütövlüyü və daxili işlərə qarışmamaq kimi beynəlxalq hüququn fundamental prinsiplərinə əsaslanan rəsmi Bakı Baltikyanı ölkələr, xüsusilə də Litva ilə münasibətlərini qarşılıqlı hörmət və bərabərhüquqlu tərəfdaşlıq müstəvisində uğurla şaxələndirməkdədir. Bu xüsusda, Litvanın Azərbaycanın Avropa İttifaqı ilə sıx əməkdaşlıq gündəliyini və institusional dialoqunu ardıcıl olaraq dəstəkləməsi ölkəmizin çoxqütblü dünya nizamında balanslaşdırılmış xarici siyasət xəttini tamamilə doğruldur. Məlumdur ki, İkinci Qarabağ müharibəsi və lokal xarakterli antiterror tədbirləri nəticəsində təmin edilən ərazi bütövlüyü Azərbaycanı regionda təhlükəsizliyin əsas təminatçısına çevirməklə yanaşı, gələcək sülh gündəliyinin də arxitektoru rolunda çıxış etməsini şərtləndirmişdir. Litva Baş nazirinin Vaşinqton Sülh Sammiti və orada əldə olunmuş razılaşmaların ildönümü münasibətilə ölkə başçısına təbriklərini çatdırması beynəlxalq birliyin postmünaqişə dövründə yaranmış geostrateji reallıqları tam şəkildə qəbul etdiyinin və Azərbaycanın regionda davamlı sabitliyin banisi kimi tanındığının aydın göstəricisidir. Müzakirələr zamanı xüsusi vurğulanan enerji təhlükəsizliyinin təmin olunması və ticarət dövriyyəsinin artırılması məsələləri isə Azərbaycanın Avropanın enerji xəritəsində əvəzolunmaz strateji tərəfdaş statusunu bir daha təsdiqləyir. Əldə olunmuş hərbi-siyasi zəfərlərin iqtisadi diplomatiya alətləri ilə möhkəmləndirilməsi, Aİ məkanı ilə geoiqtisadi bağların gücləndirilməsi və ikitərəfli ticarətin həcminin artırılması istiqamətində atılan addımlar milli maraqların iqtisadi dividendlərə çevrilməsinə xidmət edir. Yüksəksəviyyəli təmasların intensivləşməsi və beynəlxalq arenada mövcud vəziyyətə dair aparılan fikir mübadilələri göstərir ki, Azərbaycanın siyasi-hüquqi prinsiplərə əsaslanan xarici siyasət kursu qlobal müstəvidə yeni tərəfdaşlıq imkanları açmaqda və ölkəmizin beynəlxalq nüfuzunu daha da yüksəltməkdədir.

Bəhruz Məhərrəmov,

Milli Məclisin deputatı