Azərbaycan Respublikasının Prezidenti cənab İlham Əliyevin rəhbərliyi ilə keçirilən və aqrar sektorun prioritetlərinə həsr olunan müşavirədə irəli sürülən strateji vəzifələr, ardınca isə “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı”nın təsdiqlənməsi ölkənin iqtisadi siyasətində yeni bir eranın başlanğıcı hesab olunur. Bu fundamental sənəd milli aqrar kompleksin müasir çağırışlara uyğun yenidən qurulmasını, xammal istehsalından yüksək dəyər yaradan emal sənayesinə keçidi və yerli məhsulların qlobal bazarlarda rəqabət gücünün artırılmasını rəsmi hədəf olaraq qarşıya qoyur.
Qeyd olunan strateji hədəflərin və qarşıda duran vəzifələrin praktiki müstəvidə geniş müzakirəsi məqsədilə, mayın 25-də Azərbaycan Respublikasının Prezidenti İlham Əliyevin sədrliyi ilə kənd təsərrüfatı məsələlərinə həsr olunmuş geniş tərkibli müşavirə keçirilmişdir. Müşavirədə qəbul edilən proqramın icra mexanizmləri, həmçinin resurslardan səmərəli istifadə və sahəvi idarəetmənin optimallaşdırılması istiqamətində konkret tapşırıqlar müəyyən edilmişdir.
Ölkə başçısı həmçinin müşavirədə çıxışı zamanı bildirmişdir ki, bu gün dünyada gedən meyillər kənd təsərrüfatının istehsalına da mənfi təsir göstərir. Müharibələr, münaqişələr, nəqliyyat zəncirlərinin qırılması, enerji sektorundakı böhran, yanacaqla bağlı olan müəyyən çətinliklər bir çox ənənəvi istehsalçıları çətin vəziyyətə qoymuşdur. Bunu nəzərə alaraq, əlbəttə ki, hər bir ölkə öz ərzaq təhlükəsizliyi haqqında düşünməlidir və konkret addımlar atmalıdır.
Nəticə olaraq, müəyyən edilən strateji vəzifələr və qəbul olunan Dövlət Proqramı kənd təsərrüfatının inkişafında daha sistemli və məqsədyönlü mərhələnin başlanğıcını ifadə edir. Bu yanaşma yalnız istehsal göstəricilərinin artırılmasını deyil, həm də sahənin idarə olunmasında səmərəliliyin yüksəldilməsini və müasir texnologiyaların geniş tətbiqini nəzərdə tutur. Eyni zamanda, həyata keçiriləcək tədbirlər nəticəsində kənd təsərrüfatı məhsullarının emal potensialının genişlənməsi və daxili bazarın yerli məhsullarla daha yaxşı təmin olunması mümkün olacaqdır. Bütün bunlar ölkənin ərzaq təhlükəsizliyinin gücləndirilməsinə və regionların sosial-iqtisadi inkişafının sürətlənməsinə xidmət edəcək.
Aynur Quliyeva