Newscenter.az.14.02.2022. Son günlər Ramiz Mehdiyevlə bağlı baş verən prosesləri bəzi çevrələr məqsədli şəkildə cəmiyyətə “hakimiyyətdəki naxçıvanlıların vurulması” kimi təqdim edir və buna paralel şəkildə də 30 illik müstəqillik dövrünün bütün problemlərinin naxçıvanlıların üzərinə qoyulması təbliğatı aparırlar.
Müşahidələrimiz göstərir ki, bu işdə ən çox fəallıq göstərənlər vəzifələrindən çıxarılan, çıxarılması və tutluması gözlənən oliqarxların xaricdə yerləşdirdikləri “blogger şəbəkəsi” və onların müxalifət düşərgəsində gizlicə yedirib kritik dövr üçün hazırladıqları şəxslərdir.
Bu ziyanlı və separatçı təbliğatın aparılmasında əsas məqsəd isə odur ki, əhali, xüsusən də son illər paytaxt Bakıda məskunlaşmış Naxçıvan camaatı arasında regionçuluq meyllərini, yerliçilik hisslərini qızışdırmaqla, qarşılıqlı nifrət və toqquşma mühiti yaradılsın, onların passionar enerjisindən və etirazçı gücündən hakimiyyət əleyhinə yararlanılsın, beləliklə, yenidən ara qarışsın və onlar da həbsdən qurtulsunlar...
Ancaq bu təbliğatı aparanlar onu unudurlar ki, Naxçıvan camaatı nə qədər müqavimət və etirazçı gücünü qoruyub saxlasa da, ədalət hissini də itirməyib və bu bölgənin camaatı özündən və ailəsindən başqa heç kimi düşünməyən, ölkənin sərvətlərini talayıb xaricə qaçıran və öz qabiliyyətsiz, tüfeyli, pozğun övladlarının eyş-işrətinə sərf edən, el-obası üçün heç bir faydalı addım atmayan hansısa oğru məmura və onların tör-töküntüsünə, əlaltısına görə küçələrə çıxmaz!
Əksinə, camaatımızın əhvalından, nüfuzlu ağsaqqallarımızın reaksiyalarından aydın görünür ki, əslən Naxçıvandan olan və davranışlarıyla müqəddəs Naxçıvan torpağının adına ləkə olan bir çox oliqarxların zərərsizləşdirilməsində elə sadə naxçıvanlılar indi hamıdan çox maraqlıdırlar, bu yöndə Prezidentdən və güc strukturlarının rəhbərlərindən daha çox gözləntiləri var...
Vaxtilə rəhmətlik Heydər Əliyev doğulduğu Naxçıvandan SSRİ kimi nəhəng bir dövlətin Siyasi Büro üzvlüyünədək dişi-dırnağı ilə qalxmış və qalxdıqca da doğulduğu torpağa, onun adət-ənənlərinə, adamlarına sevgisini də heç vaxt itirməmiş, özüylə bərabər daşıyıb ucaltmış, təkcə özünə yox, el-obasına da hörmət, şöhrət gətirmişdi! Buna görə də onu vəzifədən çıxarandan sonra bütün Naxçıvan camaatı bu hadisəni heysiyyatına, şərəfinə toxunmuş hal kimi qəbul etdi, ayağa qalxdı, onun arxasında Mücahid Ordusu kimi səfərbər oldu!
İndi Naxçıvan camaatı kimə görə ayağa qalxmalıdır?! Rəhmətlik Heydər Əliyevin hesabına ipdən qurtulub vəzifələrə gələn, bu vəzifələrdən istifadə edib ölkəni talayan, ən varlı adamlara çevrilən, sonra da Heydər Əliyevin oğluna qarşı onun düşmənləriylə birləşən, ittifaq bağlayan oğrulara görəmi? Yanılırsınız, çox-çox yanılırsınız!
Sadə naxçıvanlılar indi Heydər Əliyevin oğluyla birləşərək, adımızı batıranları batıracaqlar ki, bir də kimsə adımızı batırmağa qalxmasın!
Elxan Şükürlü-siyasi şərhçi
