Polşa və Almaniyada fəaliyyət göstərən Sevara Group Şirkəti tərəfindən işğaldan azad edilmiş Laçında, Həkəri çayı sahilində “CamperPark Həkəri” adlı ekoparkın-düşərgənin salınması ilə bağlı layihə Azərbaycan hökümətinə artıq təqdim edilib.
Newscenter.az xəbər verir ki, bu barədə məlumatı sözügedən şirkətin rəhbəri Rəşad Quliyev verib. Şirkət rəhbəri bildirib ki, burada əsas məqsəd Zəngəzur və Qarabağın tarixini, füsunkar flora və faunasını dünyaya tanıtmaqdır:
"Bununla bağlı aidiyyatı üzrə nazirliklərə müraciət edərək, gələcəkdə qarşılıqlı əməkdaşlıq barəsində müzakirələr aparılır və artıq tərəfimizdən aparılan işlərimiz təqdirəlayiq görülür. Diasporla İş üzrə Dövlət Komitəsi ilə əməkdaşlıq edərək, gələcəkdə xarici qonaqların Azərbaycana gəlişi zamanı onların Laçına səfər etmələri və müəyyən tədbirlərin də məhz burada keçirilməsi nəzərdə tutulur. Habelə Elm və Təhsil, Gənclər və İdman Nazirliyi, Mədəniyyət Nazirliyi ilə sıx əməkdaşlıq ediləcək. Layihəmizə əsasən şagird və ya tələbələrin də asudə vaxtlarında düşərgəmizdə həm istirahət edə bilməsi həm də təhsillərini davam etdirə bilməsi üçün dövlət tərəfindən müəyyən göndərişlərin verilməsi üçün müvafiq təkliflər paketi hazırlanıb Elm və Təhsil Nazirliyinə təqdim ediləcək. Bununla da CamperPark Cənubi Qafqazda ilk dəfə məhz Laçında yaradılan bir layihə olacaq. Vaxtı ilə Ukraynada ARTEK adı ilə məşhur olan düşərgə kimi bizim düşərgə də ilin bütün fəsli fəaliyyət göstərəcək. Ərazidəki bütün tikililər mobil olacaq. Yəni təkər üzərində daşına bilən. Məhz buna görə də xüsusi bir tikinti işləri nəzərdə tutulmur. Turistlər istər bizim karavanlarda (Campervan) gecələyə bilər, istərsə də öz karavanı ilə gələrək ərazidə qısa və ya uzun müddətli qalmaq üçün müvafiq yer seçimi edə biləcəklər. Həmçinin fərqli ölçülərdə çadır düşərgəsinin də salınması nəzərdə tutulur. 4 təkərli dağ relyefinə uyğun kiçik mopedlərlə Hoçaz dağı / qayası boyunca ətraf ucqar kəndləri gəzmək, şəlalələri, bulaqları, mağaraları seyr etmək və tanımaq şansınız olacaq".
Rəşad Quliyev deyib ki, Laçın turlarımız həmçinin Almaniyada bütün Avropa əhalisi üçün reklam ediləcək:
"Bununla da ölkəmizə turist sayının artmasının şahidi olacağıq. Gələcəkdə festivalların da keçirilməsi nəzərdə tutulur ki, bu da öz növbəsində Respublikamızı tanıtmaqda böyük rol oynayacaq. Əziz Laçınlılar Laçın tamamilə yenidən qurulur. Ölkə Prezidentinin uğurlu daxili və xarici siyasəti və uzaqgörənliyi həmçinin şəhid və qazi qardaşlarımızın göstərdikləri rəşadətlə biz artıq Laçınımıza qayıdırıq. Laçında hazırda güclü tikinti, quruculuq və bərpa işləri gedir. Laçın əvvəlki Laçın deyil. Bütün kommunikasiya sıfırdan qurulub. Güclü optik internet xətii belə var. Düşünürəm ki, hər bir Laçınlı öz rayonu, şəhəri, kəndi üçün nələrsə etməlidir. Adıçəkilən şirkətin sahibi mənəm və Almaniyada yaşayıram. Amma artıq ailəmlə bərabər Laçına köçməyi planlaşdırıram. Avropadan birbaşa Laçına. Bu proyektimlə, var gücümlə Laçını dünyada tanıtmaq üçün çalışıram. Bəzi Kommentləri oxuyanda təəssüflənirəm. Kimlərsə deyir ki, bu bizim üçün deyil və s. Niyə deyil? Niyə axı istəmirsiniz ki, Laçınımız gözəlləşsin, dünyada tanınsın? Artıq 21 ci əsrdir. Elm və texnologiya vaxtıdır. Hamımız bir olub Laçınımız üçün, dövlətimiz üçün, millətimiz üçün nələrsə etməliyik. Axı biz 44 günlük müharibədə də bir olduq və nəticəsinin hamı şahidi oldu. Gəlin əl-ələ verək və gözəl layihələrə dəstək olaraq, yeni iş yerlərinin açılması və Laçınımızın gözəlləşməsi üçün əlimizdən gələni əsirgəməyək".
Mehman
