"Həkimindən hakiminə, polisində prokuroruna, mühəndisindən iqtisadçısına qədər bütün peşə sahiblərinin minnətdar olduğu bir peşə sahibi var, o da müəllimdir. Amma müəllimlərin orta aylıq əməkhaqqı 2023-cü ilin sentyabr ayında olan məlumata görə 830 manat təşkil edib".

Newscenter-az-ın xəbərinə görə, bu fikirləri səsləndirən iqtisadçı Eldəniz Əmirov deyib ki, 2023-cü ilin yanvar-may aylarında Azərbaycan iqtisadiyyatında muzdla çalışan işçilərin orta aylıq nominal əməkhaqqı isə 917 manat olub:

"Aydın məsələdir ki, müəllim əməyinin qiyməti nə bir dəstə güllə, nə hansısa hədiyyələrlə, nə də 900-1000 manat əmək haqqı ilə verilə bilməz.

Müəllimin qiyməti onun yaratdığı dəyərdədir. Bu dəyər isə bizim savadımız, şəxsiyyətimiz, etikamız və cəmiyyətdəki rolumuzdur. Hamımız öz-özümüzü savadlı, şəxsiyyətli, etikalı və cəmiyyətə rol sahibi hesab ediriksə, deməli müəllimimiz qiyməti bizim bütün bu kompanentlərimiz cəminə bərabərdir".

İqtisadçı hesab edir ki, biz hansısa əmək haqqı məbləği ilə müəllim əməyini qiymətləndirə bilmərik:

"Amma heç olmasa müəllim rəqəmlərə baxanda görməməlidir ki, onun orta aylıq əmək haqqı, ölkədəki orta aylıq əmək haqqından aşağıdır.

Böyük ümidlərlə gözləyirəm ki, müəllimlərin əmək haqqının yüksəlməsinə imkan verən sertifikasiya prosesləri bütün istiqamətlər üzrə maksimal sürətlə tamamlanacaq və ən qısa müddətdə müəllimlər təkcə sözdə deyil, aldıqları əmək haqqında da orta statistik səviyyədən yuxarıda olacaqlar".

Anar Əliyev