Özbəkistan Hava Yolları 14 ədəd Boeing 787-9 Dreamliner təyyarəsi almaq üçün Boeing ilə möhkəm müqavilə imzalayıb. Müqaviləyə daha 8 təyyarə üçün opsion daxildir. Bu barədə “Özbəkistan Hava Yolları” QSC-nin mətbuat xidməti məlumat yayıb.
Müqavilə üzrə ilkin tədarüklərin 2031-ci ildə başlanması gözlənilir.
ABŞ prezidenti Donald Tramp da özünün Truth sosial səhifəsində razılaşmanı alqışlayıb:
"Bu ayın əvvəlində mən Özbəkistanın Prezidenti, hörmətli Şavkat Mirziyoyev ilə danışdım. Bu gün Prezident Mirziyoyevi "Boeing" şirkəti ilə böyük müqavilənin imzalanması münasibətilə təbrik edirəm! "Uzbekistan Airways" 8 milyard dollardan çox qiymətə 22 787 Dreamliner alacaq. Bu, ABŞ-da 35 mindən çox iş yeri yaradacaq. Prezident Mirziyoyev sözünün adamıdır! Bu işdə bir çox məsələlərə diqqət yetirməyə davam edəcəyik."
Yeni təyyarələr Özbəkistanı daha da Mərkəzi Asiya, Avropa, Şimali Amerika, Yaxın Şərq və Asiya-Sakit okean regionu ilə birləşdirəcək.
Layihə Özbəkistan Hava Yollarının Daşkəndi regionun aparıcı beynəlxalq tranzit mərkəzinə çevirmək, turizm, investisiya və beynəlxalq əməkdaşlığa yol açmaq kimi strateji missiyasına xidmət edir.
Sentyabrın 22-də Şavkat Mirziyoyev Nyu-Yorkda ABŞ-ın aparıcı mədən şirkətlərinin rəhbərləri, eləcə də ABŞ-ın iri investisiya şirkətlərinin rəhbərləri ilə görüşlər keçirib.