28 noyabr 2025-ci il tarixində Türk Dövlətləri Təşkilatının media və informasiya üzrə məsul nazirlərinin və yüksək vəzifəli rəsmilərinin 7-ci toplantısı çərçivəsində Azərbaycan Respublikasının Medianın İnkişafı Agentliyinin İcraçı direktoru Əhməd İsmayılov ilə Türkiyə Prezidenti Administrasiyasının İctimaiyyətlə Əlaqələr Departamentinin rəhbərinin müavini Ferhat Pirinççi arasında görüş keçirilib.

Newscenter.az xəbər verir ki, görüşdə Medianın İnkişafı Agentliyinin İcraçı direktoru Əhməd İsmayılov Azərbaycan və Türkiyə arasında informasiya və kommunikasiya sahəsində formalaşmış sıx əməkdaşlıq ənənələrinin TDT çərçivəsində daha da möhkəmləndiyini diqqətə çatdırıb. O bildirib ki, iki ölkənin media qurumları arasında uzun illərdir davam edən qarşılıqlı etimada əsaslanan əlaqələr, eləcə də ortaq tarixi və mədəni bağlar informasiya mühitində koordinasiyanın daha məqsədyönlü şəkildə qurulmasına şərait yaradır. Əhməd İsmayılov Türkiyə ilə birgə həyata keçirilən layihələrin, media sahəsində təcrübə mübadiləsinin və rəqəmsal kommunikasiya istiqamətində yeni təşəbbüslərin iki ölkə üçün xüsusi dəyər daşıdığını vurğulayıb.

Türkiyə Prezidenti Administrasiyasının İctimaiyyətlə Əlaqələr Departamentinin rəhbərinin müavini Ferhat Pirinççi isə qeyd edib ki, Azərbaycan–Türkiyə münasibətləri bütün sahələrdə olduğu kimi media və informasiya sahəsində də nümunəvi xarakter daşıyır. O, TDT çərçivəsində həyata keçirilən birgə fəaliyyətlərin regional media məkanında daha çevik və effektiv əməkdaşlıq formatının tətbiqinə imkan yaratdığını vurğulayıb. Ferhat Pirinççi müasir informasiya çağırışları fonunda iki ölkənin media qurumlarının daha sıx əlaqələndirilmiş şəkildə fəaliyyət göstərməsinin, eləcə də yeni kommunikasiya alətləri və metodlarının istifadəsinin vacibliyini bildirib.

Görüşdə gələcək əməkdaşlıq perspektivləri istiqamətində geniş fikir mübadiləsi aparılıb.

Süleyman