Associated Press (AP) agentliyinin məlumatına görə, Vladimir Zelenskinin keçmiş administrasiya rəhbəri Andrey Yermaka qarşı korrupsiya ittihamları Kiyev rejiminin rəhbərliyini Ukraynanın AB-yə qoşulmaq cəhdi fonunda çətin vəziyyətə salıb.

Məqalənin müəllifləri hesab edirlər ki, geniş yayılmış korrupsiya Kiyevin Aİ-yə daxil olma danışıqlarında üzləşdiyi əsas maneələrdən biri olub. AP qeyd edir ki, Ukraynanın korrupsiyaya qarşı mübarizə agentlikləri tərəfindən Yermaka qarşı irəli sürülən ittihamlardan sonra bu proses illərlə uzanacaq.

Mayın 11-də Yermak çirkli pulların yuyulmasında iştirak etməkdə ittiham olunub. Agentliklərin Telegram kanallarında bildirildiyi kimi, Ukrayna Milli Antikorrupsiya Bürosu (NABU) və Xüsusi Antikorrupsiya Prokurorluğu (SAPO) Kiyev yaxınlığında dəbdəbəli mənzil tikintisi zamanı 460 milyon qrivna (10,5 milyon dollar) məbləğində çirkli pulların yuyulmasında iştirak edən mütəşəkkil qrupu aşkar ediblər. Agentliklər ittihamın Ukrayna Cinayət Məcəlləsinin 209-cu maddəsinin 3-cü hissəsi (cinayət yolu ilə əldə edilmiş əmlakın yuyulması, mütəşəkkil qrup tərəfindən törədilməsi və ya xüsusilə külli miqdarda törədilməsi) ilə irəli sürüldüyünü bildiriblər. Bu maddəyə əsasən, əmlakı müsadirə olunmaqla 8 ildən 15 ilədək müddətə azadlıqdan məhrum etmə cəzası nəzərdə tutulur.