Özbəkistan Prezidenti Şavkat Mirziyoyevə növbəti Daşkənd Beynəlxalq İnvestisiya Forumuna (TİİF) hazırlıqlar barədə məlumat verilib.
Dövlət başçısının mətbuat xidmətinin məlumatına görə, 2022-ci ildə ilk dəfə keçirilən forumda 56 ölkədən 1 mindən çox xarici qonaq iştirak edib.
"Bu il 16-18 iyun tarixlərində keçiriləcək beşinci Daşkənd Beynəlxalq İnvestisiya Forumunda 99 ölkədən 8 mindən çox iştirakçının, o cümlədən təxminən 3,1 min xarici qonağın iştirakı gözlənilir", - deyə məlumatda bildirilir.
Tədbirə dəvət olunanlar arasında hökumət başçıları və xarici ölkələrin nümayəndələri, nüfuzlu beynəlxalq maliyyə qurumlarının, iri şirkətlərin, investisiya fondlarının və işgüzar dairələrin rəhbərləri var.
Təqdimatda forum və onun çərçivəsində keçiriləcək tədbirlər proqramı haqqında məlumat verilib. Xüsusilə, plenar iclas, ikitərəfli görüşlər, sektorların və regionların təqdimatları, investisiya müqavilələrinin imzalanma mərasimləri və işgüzar dialoqlar keçiriləcək.
Özbəkistanın investisiya potensialını nümayiş etdirəcək sərginin kənd təsərrüfatı, yüngül sənaye, geologiya, elektrotexnika, maşınqayırma, kimya sənayesi, enerji, süni intellekt və informasiya texnologiyaları sahələrinin imkanlarını təqdim etməsi planlaşdırılır.
Forumda həmçinin Mirziyoyevin rəhbərliyi altında Xarici İnvestorlar Şurasının növbəti plenar iclası keçiriləcək.
Bu ilki forumda çoxlu sayda investisiya müqaviləsinin imzalanması da planlaşdırılır.
Hazırlanan müqavilələr kimya sənayesi, geologiya və metallurgiya, yüngül sənaye, elektrotexnika və maşınqayırma, əczaçılıq, kənd təsərrüfatı, tikinti materialları, enerji və ekologiya, rəqəmsal texnologiyalar, tikinti və infrastruktur, bankçılıq və maliyyə, nəqliyyat və logistika, turizm və təhsil kimi mühüm sahələri əhatə edir.
Vurğulanır ki, bu layihələrin həyata keçirilməsi yeni iş yerlərinin yaradılmasına, yüksək əlavə dəyərli məhsulların istehsalına, ixrac potensialının artırılmasına, infrastrukturun modernləşdirilməsinə və regionların investisiya cəlbediciliyinin artırılmasına xidmət edəcək. Dövlət başçısı forumun yüksək təşkilati səviyyədə keçirilməsinin və hər bir sektorun və regionun investisiya potensialının konkret layihələr vasitəsilə nümayiş etdirilməsinin vacibliyini vurğuladı.