2027-ci il yanvarın 1-dən etibarən Qırğızıstanda məktəbdə şagirdin gündəlik yeməyinin maliyyələşdirilməsi üçün norma 40 soma qədər artırılacaq.

Newscenter.az Qırğızıstan Prezidentinin Mətbuat Xidmətinə istinadən bildirir ki, müvafiq qərar Prezident Sadir Japarov tərəfindən verilib.

Hazırda ümumi təhsil müəssisələrinin 1-4-cü sinif şagirdlərinin qidalanması respublika büdcəsindən hər şagird üçün gündə 14 som hesabı ilə maliyyələşdirilir.

Eyni zamanda, uşaqların sağlamlığı, onların tam qidalanması və sağlam həyat tərzi üçün sabit təməlin formalaşdırılması məsələləri ölkənin uzunmüddətli sosial-iqtisadi inkişafı üçün son dərəcə vacibdir. Bu baxımdan, keyfiyyətli məktəb yeməklərinin təmin edilməsi təkcə dövlətin sosial öhdəliyi deyil, həm də ölkənin gələcəyinə qoyulan investisiya hesab olunur.

Maliyyələşdirmə dərəcəsinin 40 soma qədər artırılması pəhrizə daha çox ət və balıq yeməklərinin, süd məhsullarının daxil edilməsinə, tərəvəz və meyvə çeşidinin genişləndirilməsinə, qida çeşidinin artırılmasına, həmçinin zülallar, yağlar və karbohidratlar baxımından qidalanma balansının yaxşılaşdırılmasına imkan verəcək.

Bundan əlavə, Dövlət Başçısının bu qərarı ölkənin bölgələrində məktəb yeməklərinin təşkilində fərqlərin azaldılmasına, eləcə də ailələrin üzərinə düşən əlavə maliyyə yükünün yüngülləşdirilməsinə töhfə verəcək.

Qırğızıstan Respublikası Prezidentinin qərarını həyata keçirmək üçün Qırğızıstan Respublikasının Maliyyə Nazirliyinə 1 yanvar 2027-ci il tarixindən etibarən məktəb yeməklərinin yeni standartını maliyyələşdirmək üçün lazımi büdcə vəsaitlərini nəzərdən keçirmək tapşırılıb.

Süleyman