"Özbək Məhəlləsi" ictimai birliyi ABŞ-ın Vaşinqton ştatının Sietl şəhərində yaşayan özbəklərin təşəbbüsü ilə yaradılıb. Bu barədə "Dünyo" xəbər agentliyi məlumat verib.
Xəbər verildiyi kimi, assosiasiya rəsmi olaraq Vaşinqton ştatı hökuməti tərəfindən qeydiyyata alınıb. Bu, Sietl və onun ətrafında yaşayan özbək icmasına fəaliyyətləri üçün hüquqi əsas yaratmağa imkan verəcək.
Hazırda Vaşinqton ştatında 3000-dən çox özbək yaşayır. Onların bəziləri Sietl və onun ətrafındakı iri texnoloji və transmilli şirkətlərdə proqram təminatı, süni intellekt, mühəndislik, aviasiya, tibb və sahibkarlıq sahələrində çalışırlar.
ABŞ-ın dövlət idarəetmə sistemində 15 illik təcrübəsi olan Musa Xolmurodov "Özbək Məhəlləsi" ictimai birliyinin sədri təyin edilib. Hazırda o, Vaşinqton Dövlət İslahatlar Departamentində administrator vəzifəsində çalışır.
Assosiasiyanın məqsədi həmvətənləri birləşdirmək, milli bayramlar və mədəni tədbirlər təşkil etmək, ABŞ-a yeni gələn özbəklərin sosial adaptasiyasına kömək etmək, həmçinin gənc nəsil arasında ana dilinə və milli dəyərlərə marağı artırmaqdır.