Azərbaycanda akkreditə olunmuş xarici diplomatların toplu şəkildə Qarabağın mərkəzi şəhərlərinə — Xankəndiyə, Ağdərəyə, Kəlbəcərə və Şuşaya səfər etməsi Ermənistanda adi bir siyasi narahatlıq deyil, məhz həmin illüziyalar imperiyasının süqutu kimi qəbul edildi.

Belə ki, Ermənistanın revanşist dairələrində yaranan və parlament kürsülərinə qədər daşan isterika, əslində real coğrafiyanın virtual mifologiya üzərində qəti qələbəsinin yaratdığı travmadır.İrəvandakı revanşist müxalifəti və kilsə mühitini ən çox qorxudan məqam diplomatların Qarabağa getməsi deyil, onların bu torpaqlara Bakının müəyyən etdiyi marşrutla, Azərbaycan dövlətinin pasport və təhlükəsizlik protokolları ilə daxil olmasıdır. Beynəlxalq hüquqda bu, suverenliyin de-fakto və de-yure bütövləşməsinin ən bariz nümayişidir. Onlarla dövlətin təmsilçisi Xankəndi küçələrində addımlayarkən, Ermənistanın 30 il boyunca dünyaya sırımağa çalışdığı mübahisəli ərazi statusu birdəfəlik arxivə gömüldü.

Səfirlərin kameraya çəkilən hər bir təbəssümü, bərpa olunan binaların fonunda verdiyi hər bir rəsmi poza Ermənistanın xaricdəki lobbi şəbəkələrinin milyonlarla dollar xərclədiyi saxta kampaniyaları sıfırladı.Səfərin ən həlledici və erməni elitasını psixoloji baxımdan ən çox sarsıdan nöqtəsi Gəncəsər monastırının ziyarət edilməsi oldu. Erməni revanşizmi onilliklər ərzində Qarabağ iddialarını xristian irsinin qorunması pərdəsi altında Qərb dünyasına satmağa adət etmişdi. Lakin diplomatlara həmin abidələrin üzərindəki qədim Alban-Udi mədəniyyətinin silinməz izlərinin göstərilməsi, Ermənistanın əlindəki sonuncu mədəni-dini istismar kartını da məhv etdi.

Rafiq Əliyev
YAP Yevlax rayon təşkilatının sədri