"İnfrastrukturun mənzil bazarına təsirini üç mərhələdə izah etmək mümkündür. Birinci mərhələ — gözləntilərin formalaşması. Yeni yol, dəmir yolu bağlantısı, sənaye zonası və ya yaşayış layihəsi barədə məlumat torpaq və daşınmaz əmlaka marağı artıra bilər. Lakin bu mərhələdə yaranan maraq hələ real bazar artımı demək deyil.

İkinci mərhələ — faktiki məskunlaşma və tələb. İnsanlar əraziyə köçür, müəssisələr fəaliyyətə başlayır, xidmətlər genişlənir. Bu mərhələdə yaşayış sahəsinə real ehtiyac, kirayə tələbi və alqı-satqı imkanları formalaşır.

Üçüncü mərhələ — iqtisadi sabitləşmə. İş yerləri, gəlirlər, kommunal xidmətlər və nəqliyyat əlaqələri davamlı xarakter aldıqda əmlakın dəyəri daha dayanıqlı iqtisadi əsas qazanır".

Bunları Newscenter.az-a əmlak məsələləri üzrə ekspert Fərid Cəfərli deyib. O bildirib ki, Qarabağ üçün xüsusilə vacib olan məqam var:

"Bərpa investisiyasının həcmi ilə müstəqil mənzil bazarının dərinliyi eyni göstərici deyil. Dövlət tərəfindən tikilən və vətəndaşlara təqdim edilən yaşayış evləri sosial təminat və məskunlaşma məqsədi daşıya bilər; bu evlər üzrə əməliyyatların məhdudluğu isə bazarın ümumiyyətlə inkişaf etmədiyini göstərmir. Eyni zamanda, yeni tikintinin həcmi də özlüyündə qiymətlərin artmasını sübut etmir".

O qeyd edib ki, Azərbaycanda regional infrastruktur layihələri mənzil bazarının coğrafiyasını və gələcək inkişaf istiqamətlərini dəyişdirmək potensialına malikdir:

"Qarabağ və Şərqi Zəngəzurda aparılan bərpa-quruculuq işləri bu baxımdan xüsusi əhəmiyyət daşıyır. Lakin həmin ərazilərin daşınmaz əmlak bazarını yalnız qiymət artımı prizmasından qiymətləndirmək kifayət deyil. Əsas məqsəd dayanıqlı yaşayış mühitinin, məşğulluğun, iqtisadi fəallığın və real əmlak dövriyyəsinin formalaşması olmalıdır.

Peşəkar yanaşma ondan ibarətdir ki, hər bir region üzrə infrastruktur investisiyaları, əhalinin məskunlaşması, gəlirlər, yeni mənzil təklifi və faktiki alqı-satqı göstəriciləri birlikdə təhlil edilsin. Yalnız bu halda hansı bölgənin daha sürətlə inkişaf etdiyini, harada qiymət artımının iqtisadi əsaslara söykəndiyini və hansı ərazilərdə potensialın hələ reallaşmadığını obyektiv müəyyənləşdirmək mümkündür".

Süleyman