Hər il 22 iyul tarixi Azərbaycanda Milli Mətbuat Günü kimi qeyd olunur. Bu mühüm tarix, 1875-ci ilin məhz həmin günündə maarifçi və böyük ictimai xadim Həsən bəy Zərdabinin təşəbbüsü ilə ilk azərbaycandilli qəzet olan "Əkinçi"nin nəşrə başlaması ilə bağlıdır. Bu tarixi hadisə, Azərbaycanda mətbuatın təməl daşının qoyulması ilə yanaşı, xalqımızın milli oyanışı, maarifləndirilməsi və ictimai fikrin formalaşması yolunda əvəzsiz rol oynamışdır.
"Əkinçi" qəzeti yalnız bir mətbu nəşr deyil, eyni zamanda milli kimliyin, ana dilinin, milli düşüncənin qorunması və inkişafı istiqamətində atılmış cəsarətli bir addım idi. Həsən bəy Zərdabi bu qəzet vasitəsilə xalq arasında maarifçilik ideyalarını yaymağa, kəndliləri və sadə insanları elmə, təhsilə, tərəqqiyə səsləməyə çalışırdı. Qəzetin dili sadə və xalqın başa düşəcəyi səviyyədə idi. O, mətbuatı yalnız məlumat vasitəsi kimi deyil, həm də tərbiyə və inkişaf aləti kimi görürdü.
Bu gün də Həsən bəy Zərdabinin mətbuatla bağlı ideyaları öz aktuallığını qorumaqdadır. Onun jurnalistika prinsipləri obyektivlik, vicdanlılıq, xalqın mənafeyinə xidmət bu gün də Azərbaycan jurnalistikasının əsas meyarları kimi qəbul olunur.
Milli mətbuatımızın inkişafı heç də asan və maneəsiz olmayıb. Çar Rusiyası dövründə senzura, bolşevik inqilabından sonra isə ciddi ideoloji təzyiqlər, repressiyalar və senzura mətbuatın azad inkişafına mane olub. Lakin bütün bu çətinliklərə baxmayaraq, Azərbaycan mətbuatı həmişə milli mənəvi dəyərlərin, xalqın haqq səsinin carçısı kimi çıxış etmişdir.
Sovet dövründə ideoloji məhdudiyyətlərə baxmayaraq, Azərbaycan jurnalistləri peşəkar səviyyədə fəaliyyət göstərməyə çalışmış, ictimai maarifləndirmə və təhsil işinə böyük töhfələr vermişlər.
1991-ci ildə Azərbaycanın müstəqilliyini bərpa etməsi ilə mətbuat sahəsində də yeni bir mərhələ başlandı. 1998-ci ildə Ümummilli Lider Heydər Əliyevin fərmanı ilə mətbuat üzərində senzura ləğv olundu və bu, milli mətbuat tariximizdə dönüş nöqtəsi oldu. O dövrdən başlayaraq, azad və müstəqil mətbuatın inkişafı üçün mühüm hüquqi və təşkilati addımlar atıldı.
Prezident İlham Əliyevin rəhbərliyi ilə son illərdə mətbuatın inkişafı, jurnalistlərin sosial rifahının yüksəldilməsi, müasir informasiya texnologiyalarına inteqrasiya sahəsində ardıcıl tədbirlər həyata keçirilmişdir. Dövlətin mediaya göstərdiyi dəstək, jurnalistlər üçün mənzillərin verilməsi, media sahəsinin institusional islahatları bu sahənin inkişafına yeni impulslar qazandırmışdır.
Hazırda Azərbaycan mediası rəqəmsal transformasiya mərhələsinə qədəm qoyub. İnformasiya texnologiyalarının sürətli inkişafı, sosial media platformalarının yayılması və məlumat axınının sürətlənməsi media qarşısında yeni məsuliyyətlər və çağırışlar qoyur. Bu baxımdan media savadlılığının artırılması, peşəkar jurnalistika prinsiplərinə əməl edilməsi və informasiya təhlükəsizliyi məsələləri xüsusi əhəmiyyət kəsb edir.
22 İyul yalnız bir bayram deyil, həm də jurnalistlərin üzərinə düşən missiyanı dəyərləndirmək, medianın cəmiyyət qarşısındakı məsuliyyətini xatırlamaq üçün bir fürsətdir. Bu günün mənəvi yükü, jurnalistlərin və media qurumlarının daha məsuliyyətli, obyektiv və cəmiyyətə faydalı fəaliyyət göstərməsi üçün bir stimul rolunu oynayır.
Milli mətbuatımız hər zaman xalqın yanında olmuş, onun səsini dünya ictimaiyyətinə çatdırmış, ədalətin, haqqın müdafiəçisi olmuşdur. Xüsusilə, Vətən müharibəsi dövründə Azərbaycan mediasının tutduğu mövqe, informasiya cəbhəsində apardığı mübarizə bir daha göstərdi ki, jurnalistlərimiz həm də vətənpərvər informasiya əsgərləridir.
22 İyul – Milli Mətbuat Günü, Azərbaycan jurnalistikasının keçdiyi çətin və şərəfli yolun, qazandığı uğurların və gələcək hədəflərinin simvoludur. Bu əlamətdar gün münasibətilə bütün jurnalistləri, media nümayəndələrini təbrik edir, onlara məsuliyyətli və prinsipial fəaliyyətlərində uğurlar arzu edirik.
Elşən Səfərov
YAP Ağcabədi rayon təşkilatının məsləhətçisi
