İlk olaraq, növbədənkənar iclas çağırmaq qərarını alqışlayırıq, təşəbbüsün yüksək dövlətçilik mövqeyinizdən irəli gəldyini, prezident İlham Əliyevin rəhbərliyi ilə aparılan siyasətə parlament hakmiyyətinin töhfəsi kimi dəyərləndirirk...
2003-cü ilin avqustunda Ulu öndər Heydər Əliyevin tarixi missiyasını qəbul edən İlham Əliyev düz 22 il sonra məhz həmin ayda Ağ Evdə növbəti tarixi uğurlara imza ataraq, Kürəkçaydan Bişkek protokollarına qədər davam edən itkilər silsiləsinə son qoydu, yeni qalib Yüz ili başlatdı.
Vətən müharibəsində Qələbəmiz olmasaydı, Vaşinqton görüşləri gerçəkləşməzdi. Ölkəmizi dünya gündəliyinə çıxaran Qurtuluş savaşımızdır. 8 avqust Zirvəsi 8 noyabr Zəfərinin nəticəsi və davamıdır, diplomatiyada qazanılan Şuşa yüksəkliyidir. Müharibələrin tarixi göstərir ki, əgər sən düşməni məğlub edib nəticələri sənədləşdirməmisənsə, ordunun qazandığını qələm davasında itirmisən, demək. Ali Baş Komandansa sübut etdi ki, O, silahlı savaşdan sonra sülh müharibəsini də udmağı bacardı.
90-cı illərdə biz ən geri düşən ölkə olduq, indi isə Azərbaycan 21-ci əsrdə tək qalib dövlətdir. İki ay öncə başlayan 12 günlük İsrail-İran müharibəsi, 4 ildir davam edən Rusiya-Ukrayna və nəhayət, Fələstin dəhşətinin fonunda dövlətimizin uğurları daha parlaq görünür.
17 il əvvəl məhz 8 avqustda Rusiya tankları Poti limanında lövbər salanda da İlham Əliyev Qafqazı xilas etmişdi, çoxları risq etməyəndə 5 dövlət başçısına Gəncədən Tiflisə getməyə yol açmışdı. 2025-ci ilin avqustun 8-də isə Ağ Ev razılaşmaları təkcə iki dövlətin deyil, bütövlükdə regionun taleyi, eləcə də dünyada mövcud müharibələrin ədalətli həlli üçün bir örnəkdir. İndi dünyada 61 dövlətlərarası aktiv münaqişə, 122 milyondan çox məcburi köçkün və qaçqın var. O siyahıdan çıxan tək ölkə bizik.
Vaşinqtonda paraflanan və 11 avqustda açıqlanan sülh müqaviləsi layihəsində bir cümlə də olsun Qarabağ sözü yoxdur, etnik ermənilərin geri qayıdışına dair tələblər irəli sürülmür, tam əksinə, Qələbəmizin legitimliyi qəbul edilir.
Nəhayət, Azərbaycanın qəti mövqeyi ilə ATƏT Minsk qrupunun ləğvi-Birinci Qarabağ müharibəsindən sonra işğalı qoruyan monopolist birliyin varlığına son qoyulması əsil müstəqillik hadisəsidir. Gerçək azadlıq belə olur, cənablar! Son 30 ildə heç bir təşkilat fəaliyyətinə könüllü xitam verməyib. Mənə elə gəlir ki, SSRİ-nin dağılması yalnız indi başa çatır. Tam və qəti qələbədən əsil müstəqillik və suverenlik doğulur. Ona görə də İlham Əliyev 21-ci əsrin milli azadlıq hərəkatının və qalib Xalqın lideridir.
İmzalanan sənəddə Tramp yolu adlanan Zəngəzur dəhlizinin açılması regionu beynəlmiləl döyüşlərin meydanına, geosiyasi toqquşmalara deyil, hamının qazanacağı tranzit qovşağına çevirəcək. Naxçıvanla maneəsiz, heç bir sərhəd yoxlaması olmadan birləşmək babalarımızın məğlub taleyini dəyişdirmək deməkdir. Əgər Rəsulzadə, Nərimanov, Bağırov sag olsaydılar, onların portreti altında prezidentə yol göstərənlərə deyərdilər-İlham Əliyev bizim itirdiklərimizi qaytardığı üçün bütün əsrlərin lideridir.
Ağ Ev Zirvəsinin nəticələrini 100-dən çox dövlət, 10-larla beynəlxalq təşkilat alqışlayıb, deməli, Qələbəmizi onlar da tanıyıblar.
Vaşinqton görüşünün ən böyük uğurlarından biri də onun məxfi, uzun illər regionda böyük kəşfiyyat şəbəkələri olan dövlətlərdən gizli aparılmasıdır. 1999-cu ildə Ermənistan parlamentinin gülləbaran edilməsini bir daha xatırlayanda, sui-qəsdlərsiz sülhü qazanmaq böyük nailiyyətdir.
Beləliklə, Azərbaycan təkcə torpaqlarını geri qaytarmadı, həm də çoxəsrlik Qarabağ savaşını bitirdi. Bəli, Qafqazın ən uzunömürlü müharibəsi tarixə qovuşdu. Bölgəni daima konfliktlərlə idarə edən, fobiyalarla yönəldənlər “Əliyevin sülh müqaviləsi”nin qarşısını ala bilmədilər.
105 il əvvəl Vudro Vilsondan 143 min kvadrat km-lik Ermənistanın sənədini alan, onu Atatürk Cümhuriyyətinə qarşı silaha çevirən erməni liderlərindən fərqli olaraq, Paşinyan 29 min kvadrat km-lik dövlətini ABŞ rəhbərlərinə deyil, Azərbaycan prezidentinə tanıtmağı yeganə xilas yolu sayır. Fərqi görün və sual edin, tarixdə İrəvanın taleyi Bakıda nə vaxt belə həll olunub?
Qarabağın qlobal gündəlikdən çıxması əsrlərdir savaşlara xərclənən sərvətlərimizi yeni Vətən quruculuğuna, Böyük Qayıdışa yönələcəyini deməyə imkan verir.
20 sentyabrda İrəvanda hakimiyyəti devirmək üçün Xankəndini könüllü tərk edəndən sonra son 300 ildə ilk dəfə erməni məsələsi Azərbaycanın coğrafi hüdudlarından kənara çıxarılıb, milli dövlətimizi dağıdan mina və beynəlxalq təzyiq aləti kimi rolunu itirib.
Prezident əl-Ərəbiyyə televiziyasına dedi, sitat-biz Ermənistanla düşmənçiliyə son qoyduq, indi sülhü inşa edəcəyik! Gəlin, nə qədər çətin olsa da xalqlarımızı barışa hazırlayaq. Etimad mühitinin quruculuğu üçün yaxın gələcəkdə birgə parlament komissiyasının yaradılacağına inanırıq.
Qoy millətlər zülmətdən qurtulsun, evlərə, ocaqlara dinclik və əmin-amanlıq gəlsin. Tam və qəti qələbəmiz mübarək olsun!
Zahid Oruc, Milli Məclisin deputatı
