Azərbaycan Respublikası ilə Qırğız Respublikası arasında iqtisadi əməkdaşlığın ən mühüm və səmərəli mexanizmlərindən biri olan Azərbaycan–Qırğız İnvestisiya Fondu iki ölkə arasında investisiya əlaqələrinin genişlənməsinə və biznes mühitinin inkişafına mühüm töhfə verir. Prezident İlham Əliyevin Qırğızıstana dövlət səfəri çərçivəsində Fondun nizamnamə kapitalının 200 milyon ABŞ dollarına çatdırılması barədə qəbul edilən qərar onun maliyyə imkanlarını əhəmiyyətli dərəcədə genişləndirmişdir.
Bu qərar yalnız birbaşa xarici investisiyaların həcminin artırılmasına deyil, eyni zamanda Azərbaycanda və Qırğızıstanda kiçik və orta sahibkarlığın inkişafına, infrastruktur layihələrinin maliyyələşdirilməsinə, yeni istehsal müəssisələrinin yaradılmasına və innovativ təşəbbüslərin dəstəklənməsinə xidmət edir. Fondun vəsaitləri hesabına kənd təsərrüfatı, emal sənayesi, bərpa olunan enerji, turizm və logistika kimi strateji əhəmiyyət daşıyan sahələrdə perspektivli layihələrin həyata keçirilməsi nəzərdə tutulur.
Fondun nizamnamə kapitalının artırılması, eyni zamanda, Azərbaycan və Qırğızıstan arasında qarşılıqlı etimadın, möhkəm siyasi iradənin və uzunmüddətli iqtisadi tərəfdaşlığın göstəricisidir. Bu təşəbbüs əməkdaşlığın yalnız siyasi bəyanatlarla deyil, konkret maliyyə mexanizmləri və praktik layihələrlə dəstəkləndiyini nümayiş etdirir.
Azərbaycan–Qırğız İnvestisiya Fondu vasitəsilə maliyyələşdirilən layihələr yeni iş yerlərinin yaradılmasına, ixrac potensialının genişlənməsinə, regionun investisiya cəlbediciliyinin artmasına və Mərkəzi Asiyada iqtisadi fəallığın yüksəlməsinə mühüm töhfə verəcəkdir. Eyni zamanda, Fond gələcəkdə iki ölkənin birgə istehsal etdiyi məhsulların beynəlxalq bazarlara çıxarılması, rəqabətqabiliyyətli brendlərin formalaşdırılması və regional iqtisadi inteqrasiyanın daha da dərinləşdirilməsi üçün etibarlı platforma rolunu oynayacaqdır.

Nazilə Abbasova