Azərbaycan müstəqil və suveren dövlətdir. Beynəlxalq hüquq və BMT Nizamnaməsi onun ərazi bütövlüyünü, siyasi müstəqilliyini və konstitusiya quruluşunu müstəqil şəkildə müəyyən etmək hüququnu qoruyur.

Newscenter.az xəbər verir ki, bunları beynəlxalq hüquq müdafiəçisi David Seliverstov son günlər Rusiya informasiya məkanında Azərbaycanla bağlı səsləndirilən təhdid və təxribat xarakterli yazıları və buna qarşı Azərbaycanın hüquqi müstəvidə atdığı addımları şərh edərkən deyib.

O bildirib ki, söz azadlığı zorakılığa, terrorizmə, hakimiyyətin ələ keçirilməsinə və ya dövlətin ərazi bütövlüyünün pozulmasına açıq şəkildə çağırış etmək hüququnu nəzərdə tutmur:

"Məhz buna görə də Azərbaycan qanunvericiliyi bu cür hərəkətlərə görə məsuliyyət nəzərdə tutur. Xüsusilə vurğulamaq vacibdir ki, bir şəxsin 1991-ci ildən əvvəl SSRİ-də doğulması Rusiyaya onları yalnız bu əsasda mühakimə etmək hüququ vermir. SSRİ-nin dağılmasından sonra Rusiyanın varisliyi müstəqil Azərbaycanın vətəndaşları üzərində Sovet yurisdiksiyasının bərpası demək deyil.

Eyni zamanda, təqsirləndirilən şəxslərin təqsirsizlik prezumpsiyası, müdafiə və ədalətli məhkəmə araşdırması hüququ var. İşin başlanması və beynəlxalq axtarış mütləq məhkəmə tərəfindən təqsirliliyin müəyyən edilməsi demək deyil. Beləliklə, əgər ictimai bəyanatlarda həqiqətən də zorakılığa, terrorizmə, konstitusiya quruluşunun zorla dəyişdirilməsinə və ya Azərbaycanın ərazi bütövlüyünün pozulmasına çağırışlar varsa, prokurorluğun istintaqa başlamaq üçün qanuni əsasları var idi".

David Seliverstov bildirib ki, hüquqi dövlətdə qiymətləndirmə şəxsin milliyyətinə və ya siyasi baxışlarına deyil, onun konkret sözlərinə, hərəkətlərinə, sübutlarına və qanuna əsasən aparılmalıdır.

Süleyman