Çərşənbə, 1 dekabr 2021, 23:17:05  
Sizin Reklam Burada.

Yeni Azərbaycan Partiyası - Qələbələr Partiyası

Yeni Azərbaycan Partiyası - Qələbələr Partiyası



Azərbaycanın müasir dövlətçilik tarixinin mühüm mərhələlərindən biri olan Yeni Azərbaycan Partiyasının təsis edilməsindən 34 il ötür. 1992-ci il noyabrın 21-də Naxçıvan şəhərində keçirilən təsis konfransı ilə siyasi fəaliyyətə başlayan partiya ölkədəki dərin ictimai-siyasi böhranın aradan qaldırılması və milli həmrəyliyin təmin edilməsi zərurətindən meydana gəlmişdir.
Ümummilli Lider Heydər Əliyevin rəhbərliyi ilə formalaşan Yeni Azərbaycan Partiyası qısa müddətdə ümumxalq etimadı qazanaraq ölkənin aparıcı siyasi qüvvəsinə çevrilmişdir. Partiyanın hakimiyyətə gəlişindən sonra respublikada sabitlik bərqərar olmuş, hüquqi dövlət quruculuğu, azad bazar iqtisadiyyatına keçid və beynəlxalq əməkdaşlıq istiqamətində əsaslı islahatlar həyata keçirilmişdir. Dövlət dilinin qorunması, milli atributların bərpası və azərbaycançılıq məfkurəsinin dövlət siyasətinin əsasına çevrilməsi partiyanın ideoloji xəttinin başlıca prinsiplərini təşkil etmişdir.
Bu gün Azərbaycan Respublikasının Prezidenti, Yeni Azərbaycan Partiyasının Sədri İlham Əliyevin rəhbərliyi altında təşkilat öz inkişafının yeni mərhələsini yaşayır. Ötən dövr ərzində aparılan məqsədyönlü siyasət nəticəsində Azərbaycanın iqtisadi qüdrəti artmış, müdafiə potensialı güclənmiş və ölkəmizin ərazi bütövlüyü ilə dövlət suverenliyi tam təmin olunmuşdur. Partiyanın VII və VIII qurultaylarında qəbul edilən qərarlar müasir dövrün çağırışlarına uyğun olaraq idarəetmənin təkmilləşdirilməsinə, ideoloji işin gücləndirilməsinə və postmünaqişə dövrünün strateji hədəflərinin reallaşdırılmasına xidmət edir.
Fəaliyyətinin 34-cü ildönümünü qeyd edən Yeni Azərbaycan Partiyası bundan sonra da ölkənin davamlı inkişafı, ictimai-siyasi sabitliyin qorunması və dövlət müstəqilliyinin möhkəmləndirilməsi istiqamətində öz missiyasını uğurla davam etdirəcəkdir.
Aynur Quliyeva
YAP Yevlax rayon təşkilatının əməkdaşı.
Xəbəri paylaş