Türkiyə, Səudiyyə Ərəbistanı və Pakistan arasında bağlanan Məkkə Qarşılıqlı Müdafiə Sazişi genişləndirilməyə açıqdır. Bu proses NATO üzvlük prosesinə bənzər şəkildə onların istəyi ilə həyata keçirilə bilər.

Newscenter.az xəbər verir ki, bu barədə Türkiyə xarici işlər nazirinin müavini Levent Gümrükçü bildirib.

"Bu razılaşma yeni üzvlərin qəbulu üçün açıqdır. Alyansın yaxın gələcəkdə genişlənməsi planlaşdırılır. Buna NATO-ya qəbul prosesinə bənzər şəkildə üç ölkənin qərarı ilə nail olmaq mümkündür. NATO ölkələrində olduğu kimi, Türkiyədə də bu məsələ təsdiq üçün parlamentə təqdim ediləcək", - deyə Levent Gümrükçü vurğulayıb.

Onun sözlərinə görə, Məkkə sazişi heç kimə qarşı yönəlməyib, buna görə də onun yaradılması ilə bağlı razılaşmada ümumi və ya spesifik təhdid anlayışı yoxdur.

Nazir müavini qeyd edib ki, Məkkə Sazişini təsdiqləyən qanun layihəsi bu həftə parlamentin Xarici İşlər Komitəsində qəbul edilib və Böyük Millət Məclisində təsdiqlənməlidir.

Xatırladaq ki, Məkkə Sazişi avqustun 7-də Türkiyə Prezidenti Rəcəb Tayyib Ərdoğan, Səudiyyə Ərəbistanının vəliəhd şahzadəsi Məhəmməd bin Salman Əl Səud və Pakistanın Baş naziri Şahbaz Şərif tərəfindən imzalanıb. Oktyabrın 5-də tərəflər birgə müdafiə öhdəliklərinin praktiki şəkildə həyata keçirilməsini davam etdirmək və razılaşdırılmış hərbi qüvvələrin və aktivlərin Səudiyyə Ərəbistanına yerləşdirilməsi üçün addımlar atmaq barədə razılığa gəliblər.

Süleyman