Biz çalışırıq, çünki zəhmət ruhu tərbiyə edir. Biz düşünürük, çünki düşünmək vicdanı saflaşdırır. Biz mübarizə aparırıq, çünki ədalət sükutda məhv olur. Biz qalib gəlirik, çünki qələbə — insanın Həqiqətlə birləşdiyi andır.

Biz kainatın bir zərrəsiyik, amma hər zərrədə Tanrının nurundan bir parça yaşayır. Bəzən elə həmin nur bütöv bir millətin şüurunu oyada bilir. Bizim gücümüz nə hakimiyyətdə, nə sərvətdədir-bizim gücümüz ədalət, sevgi və mərhəmət arasındakı tarazlıqda, insanda və dövlətdə Tanrını görə bilmək bacarığındadır. Çünki hüquq təkcə qanunlarda yazılmır-o, vicdanın səssiz sətirlərində başlayır.

Hüquq-Yaradanla insan arasında bağlanmış müqavilədir: dürüst yaşamaq, mərhəmətlə hökm vermək və sevgini paylaşmaq. Biz sevgidən doğan xidmət edirik, çünki sevgi-vətəndaşlığın ən ali formasıdır. O, mükafat istəmir, o, məsuliyyət tələb edir. Vətənə, xalqa, dövlətə sevgi-nə əmrdir, nə şüar; bu, insanın özünə qarşı mənəvi borcudur. Çünki dövləti sevmək — tabe olmaq deyil, yaratmaqdır. Baş əymək deyil, anlamaqdır ki, xeyirə xidmət etmək Vətəni möhkəmləndirmək deməkdir.

Bəziləri düşünür ki, biz kiməsə borcluyuq. Xeyr-biz yalnız Tanrıya, vicdana və doğma torpağa borcluyuq. Bu borcu sözlə deyil, əməl ilə ödəmək olar. Əl uzatmaq, ədalətsizliyə qarşı susmamaq, zəifi müdafiə etmək- Tanrının dilində dua deməkdir. Biz qanun yazmaq üçün yox, vicdanı oyatmaq üçün varıq. Biz hökm çıxarmaq üçün yox, ədaləti insanın içində diriltmək üçün yaşayırıq. Çünki əsl hüquq məhkəmədə deyil, insanın ruhunun dərinliyində yaranır. Biz dövlətə qarşı deyilik-biz dövlətin nəfəsiyik. Biz Vətəndən ayrı deyilik- biz onun ilahi gücünün aynasıyıq. Çünki Tanrı insanı sevgi ilə yaratdı, insan isə dövləti yaratdı ki, bu sevgini qanunla, nizamla və mərhəmətlə qorusun.

Əgər bu dünyada bir insanın haqqı tapdalanırsa-deməli, biz hamımız borcluyuq. Əgər bir uşaq ağlayırsa —
deməli, ədalət hələ yer üzünə tam enməyib.

Mən, David Seliverstov, inanıram ki: Hüquq-mərhəmətin formasıdır, Sevgi-ədalətin nəfəsidir, Mərhəmət-dövlətin üzü, Dövlət isə-xalqın Tanrıya yönəlmiş vicdanıdır.

David Seliverstov, Magen David Azərbaycan İnsan Hüquqları Müdafiə Mərkəzinin rəhbəri