Azərbaycan və Ukrayna arasında münasibətlər uzun illərə söykənən və strateji tərəfdaşlıq səviyyəsinə yüksəlmiş əlaqələrdir. Hər iki ölkə beynəlxalq hüququn prinsiplərinə əsaslanaraq bir-birinin suverenliyini, ərazi bütövlüyünü və sərhədlərinin toxunulmazlığını daim dəstəkləyir. Bu mövqe həm ikitərəfli münasibətlərdə, həm də beynəlxalq təşkilatlar çərçivəsində açıq şəkildə özünü göstərir. Siyasi dialoq yüksək səviyyədə inkişaf edib və dövlət başçıları arasında müntəzəm görüşlər keçirilir. Bu görüşlər qarşılıqlı etimadın möhkəmlənməsinə və əməkdaşlığın yeni istiqamətlər üzrə genişlənməsinə şərait yaradır. Hökumətlərarası komissiyalar, nazirliklər səviyyəsində keçirilən məsləhətləşmələr və rəsmi səfərlər əlaqələrin sistemli şəkildə inkişafına xidmət edir. İqtisadi sahədə əməkdaşlıq dinamik xarakter daşıyır. Ticarət dövriyyəsi ildən-ilə artır, müxtəlif sahələrdə sərmayə qoyuluşu imkanları genişlənir. Xüsusilə energetika sahəsində əməkdaşlıq mühüm yer tutur və SOCAR-ın Ukraynada fəaliyyəti bu sahədə uğurlu nümunə hesab olunur. Bununla yanaşı, nəqliyyat, logistika və sənaye sahələrində də birgə layihələr üçün geniş potensial mövcuddur. Hərbi-texniki sahədə də əməkdaşlıq inkişaf edir. Hər iki ölkənin hərbi sənaye kompleksinin imkanları nəzərə alınaraq birgə istehsal və texnologiya mübadiləsi istiqamətində perspektivlər mövcuddur. Eyni zamanda humanitar sahədə – təhsil, mədəniyyət və digər istiqamətlər üzrə əlaqələr xalqlar arasında dostluq münasibətlərini daha da gücləndirir. Bütün bu amillər göstərir ki, Azərbaycan və Ukrayna arasında münasibətlər davamlı, çoxşaxəli və qarşılıqlı maraqlara əsaslanan şəkildə inkişaf edir və gələcəkdə daha da genişlənmək üçün böyük potensiala malikdir.
Sara Hüseynova
YAP Yevlax rayon təşkilatının fəalı