Yenidən magistraturaya qəbul imtahanının iyunun 14-də keçirilməsi ilə bağlı qəbul olunan qərarı doğru, həssas və ədalətli yanaşma hesab edirəm. Çünki mayın 17-də müşahidə olunan ağır hava şəraiti, intensiv yağışlar və nəqliyyat sistemində yaranmış ciddi çətinliklər səbəbindən bəzi bakalavrlar imtahan mərkəzlərinə vaxtında çata bilməyiblər. Bu hal onların hazırlıq səviyyəsi və biliyi ilə deyil, tamamilə fors-major vəziyyətlə bağlı idi.
Hesab edirəm ki, belə məqamlarda əsas prinsip gənclərin hüquqlarının qorunması və hər kəs üçün bərabər imkanların təmin edilməsidir. Aylarla imtahana hazırlaşan bir gəncin yalnız hava şəraiti və ya nəqliyyat problemi səbəbindən öz biliyini nümayiş etdirə bilməməsi onun gələcəyinə mənfi təsir etməməlidir.
Dünya təcrübəsində də buna bənzər hallarla tez-tez qarşılaşılır. Müxtəlif ölkələrdə qasırğa, qar fırtınası, sel, zəlzələ, pandemiya və digər fövqəladə hallar səbəbindən imtahanların təxirə salınması və ya yenidən təşkili praktikası tətbiq olunub. ABŞ və Avropa ölkələrində hava şəraiti ilə əlaqədar qəbul imtahanlarının tarixinin dəyişdirilməsi artıq normal və qəbul edilmiş yanaşmalardan biri hesab olunur.
Xüsusilə COVID-19 pandemiyası dövründə bir çox beynəlxalq imtahan proqramları ya ləğv edildi, ya da alternativ qiymətləndirmə mexanizmləri tətbiq olundu. Bir sıra ölkələrdə isə fövqəladə şərait nəzərə alınaraq şagird və tələbələr üçün əlavə imtahan günləri ayrıldı. Bu yanaşmaların əsas məqsədi gənclərin hüquqlarının qorunması və onların gələcəyinin təsadüfi amillərdən asılı vəziyyətə düşməsinin qarşısını almaq idi.
Bu baxımdan iyunun 14-nə təyin olunan əlavə imtahan qərarı həm humanist yanaşmanın, həm sosial ədalət prinsipinin, həm də dövlətin gənclərin təhsil hüququna həssas münasibətinin nümunəsidir. Belə qərarlar cəmiyyətdə etimadı gücləndirir və göstərir ki, əsas məqsəd formal prosedur deyil, obyektiv və ədalətli qiymətləndirmənin təmin olunmasıdır.
Düşünürəm ki, gənclərin təhsil və gələcək imkanları ilə bağlı məsələlərdə çevik, anlayışlı və məsuliyyətli yanaşma nümayiş etdirmək olduqca vacibdir. Çünki təhsil yalnız imtahan nəticəsi deyil, eyni zamanda insan kapitalının formalaşması və ölkənin gələcəyinə qoyulan ən mühüm sərmayədir.
Ceyhun Məmmədov, Milli Məclisin deputatı
